Yakobo 2 - Biblía Axweesantá Hhohho' ar Mungú 2004

Gurbu'uungw daanduú barqaanti

¹ Hhaee'eé', kuungá' Aakoorén Yesu Kristo ugwa haratlintié', kudá' baraá xirfuú wa hoót. Gawaá adoorihe kuungá' bar alhotá' nee muu, barqaanti ma tlehhiitara'.

² Ar slaqsaywo múk tsár bar naa hardáh baraá doohúng oo saaliingw. Oo wák inqwaruú hhohhó' ngwa tsiít, nee munga'aá mirii/a' awa sahaábu ngaa dahaás. Oo tsár a liitlakusmo, slám inqwaruú naa dahaás ku slasla/arén.

³ Barnaxes Kuungá' heedaáduú inqwaruú hhohhó' ngwa dahaas, ugwa ilaiwa/é', kuri beera', «Na'ás qwaláng, diirí hhoohhoo' i iwiiteek.» Ala kuduú liitlakusmo kuri beera', «Kuúng diisíng i sihhiiteek,» laqaá, «Qwaláng, diirír ya'aaeé' i iwiiteek.»

⁴ Xáy kuungá' adoorí bara tlehhé', barqaanti aga tlehhí'iíke baraá tla/angwhunge? Xáy, sakwasleemár ganaa'aaká kay tlehhí'iíke ar inslawayhúng kudá' tlakw taa eehadé'?

⁵ Hhaee'eé' awa sla'aaruúse, iia qaasaak. Ahaá, Mungú liitlakuusér baraakaá yaamu gaa tsawaáriíke, tawa daqaarér haratlintaao, nee aaluusér waawuti'iimadá' aa al'axweés ngiwa haniisi dír mukdá' inós gu slaá'.

⁶ Ala kuungá' liitlakusmo una mureekesé'. Múk kuungá' nu slahh'eemiís nee nu huwahuúw baraá maraá kwasleema, a daqaareéroóke?

⁷ Slám múk umuuhúng kwisíng hhoohhoó' oo Mungú naa haniís gu /oosliisliím a inooíneéka?

⁸ Ala bar kuungá' dabeedár waawuti'iima aga boo/esé', tidá' kah, «Inslaawmoowók slaeek, adoodár kuúng tir kilók sla',» daqaní kuungá' adór hhoo' aga tlehhé'.

⁹ Ala bar kuungá' muu ugwa barqaantusé', tlakweema iga tlehhé', nee dabe nuri sakwasleemút, tawa adór múk dabe gaa sii' eeharto.

¹⁰ Hee bar dabe sleémeero gaa óh, ala hara'ayár wák gari sií', inós dabe sleémeero gaa sií'.

¹¹ Asma kudaádá' aa oo', «Ma fuquusaar,» a kudaádá' aa oo', «Hee mu gaasaar» sleeme. Ala kuúng tam aga fuqusiká, ala bar aga tsu/út, kuúng dabe sleémeero aga sí'.

¹² Axweesanayhúng nee tlehhemi'iihúng masók a adór kudaá mukdá' ta sakwasleemuuti ar dabeedár muu gu gweer baraá lawaali'iimaro.

¹³ Asma sakwasleema i gurtleemuú koondaaká dír heedaádá' gurtleemu gwa tleehhiikahe. Ala heedaádá' gurtleemu gwa tleehh, gár i da'ayumiiti i káhh dír geeraá kwasleemaro.

Haratlintaao nee tlehhmi'i

¹⁴ Hhaee'eé', hee bir kaahi, «Aníng a haratlintaaór koóm,» ala barnaxes tlehhema'aá haratlintaaór laqaaqaamá' gi konká, haratlintaaoodá' gár i bu' a milá? Xáy, haratlintaaoodá' gu ba/amísa?

¹⁵ Ar slaqsaywo an ooaan hhiyaako wák laqaá hho'orka wák gár aa tsít a inqwaruú slaxareemo, nee muruú /ayma gu koondaaká,

¹⁶ ala heé wák baraá tla/angwhunge binga báy, «Tláw ar wayda, inqwaruú tsaaqwa ga ilaá/ tsiiteek, /ayma aweek,» ala barnaxes gár taa hanisé' i káhh ar slaqwtós ga gaa wa buu', alee/isoó aa sleér a milá daqaní?

¹⁷ Haratlintaao sleeme a adoosíng. Barnaxes haratlintaao aa geehhoouuriiká ar baraá tlehhemi'i, haratlintaaoodá' aa gwá'.

¹⁸ Laqaá daqtakaaro heeko i ooi, «Kuúng gár ta koon a haratlintaao, aníng gár ni koom a tlehhemi'i.» Ala gár án ni oo' a tí, «Haratlintaaoorók tidá' tlehhema'aá koomaaká laqaamang, adór tar haratlintaaór ló', nee daqaní aníng haratlintaaor'eé' ngi laqaám ar loohír tlehhemi'i, adór tar ló'.»

¹⁹ Kuúng a haratlintaatí' adór Mungú tar wak. Adoosíng i qoón. Tam neetlaame sleeme adoosíng ga haratlintaatí', nee in daaráx daeero.

²⁰ Kuúng a daktani. Kuúng a xu'ukáhe adór haratlintaaór tlehhema'aá koomaaká, gár i bu' ir káhh.

²¹ Ahaá, baabuúrén Abrahamu kuwa gan'amuú i harafaár, gár kusa gan'amuú i harafaár a tlehhemi'iiwookáhe, qoomár garmaawós nguwa ilahhooár wa haniís gawaá kitángw ilahhooa.

²² A ga/eéraáke, haratlintaao gadiyeé gana tléhh dinkwa nee tlehhemi'iiwós, nee haratlintaaoorós iri bó/ ar loohír tlehhemi'i.

²³ Gawaá adoorihe Gooidá' iri bó/, tidá' aa kat, «Abrahamu Mungú guna haratlintií', inós kuri gan'amuú i harafaár as haratlintaao,» slám inós kuri báy a mulqumoó Mungú.

²⁴ Gawaá adoorihe a ga/eéraáke adór hee kur gan'amuú i harafadiiti as tlehhemi'i ala as haratlintaao kiloseeká.

²⁵ Tam Rahabu sleeme, tidár tsaatuso'o, an adoodá'. Inós ya/abuuseedár aáng gana dahi'ís nee gari dúx ar loohír hatlá'. Inós kaa gan'amuú i harafaáriíke as tlehhemi'iidá'?

²⁶ Asma muuná bira /eét, slaqwa aa gwá'. Gawaá adoorihe tlehhemi'i bir kahhiyá' sleeme, haratlintaao aa gwá'.