WA/AA/I 5 - Biblía Axweesantá Hhohho' ar Mungú 2004

Firo as gurtleemu

¹ AAKOÓ MUNGÚ muruuwí atén taa slay inslaweek, ga/aaweek, murekesayrén i qayteek.

² Aalirén kaa haniís dír dahaaye, marayrén kin hoot nee múk hatlá'.

³ Atén a adór panaay, múk baabi'i wásl, amuurén a adór kwaeeli.

⁴ Ma'aá wahaangw a tlaxo, nee migír sleeme a tlaxo.

⁵ Tina ar gadiyuús adór makaay, taaqwanaay i gawaá isoorén, tam aga slaaqamitaán, hungu/uusa i káhh.

⁶ Múk Misri nee oo Ashuru una dabaá i hanisaán as muruú /aymár bu'uút kuwa slawaan.

⁷ Baabi'iirén tlakweema ngina tleehhiyé', hám inooín i kahhiyá', hamí atén an slahhahha'aán as dakuúsár inooín naa tleehhiyé'.

⁸ Lawaale an múk ti sawaawuti'ii'iím, nee gawaá dabaaine heé ti ba/amís i kaahh.

⁹ Slafingwrén una alií qaasaán as muruú /ayma kuwa slawaan, asma múk tsu/uút i baraá darma.

¹⁰ Atén ana tsi/imitaán adór bohóngw asla, asma qwari tiwa dá/.

¹¹ /Ameenarén kana /uurúr ohín baraá gixsár Siyoniro, nee dasuurén sleeme baraá gixsadaá Yudawo.

¹² Inooín geeraharuuseerén kana dabaaínár tareereín, tam bariiseerén ngaa ilaiwawa/ii'iiká.

¹³ Masoombár daaqaay kana /uurutimís iwa xoosliin ar tla/u, daaqaay in ta/amiit as migíruú iló'.

¹⁴ Bariise axweesanoó tliintu gway meér, nee masoomba /ayla gaa meér.

¹⁵ Qwala/ aa faák baraá muuneerene, ni/imaarén kaa warqeés tawa tsuunqumis.

¹⁶ Muruudá' aáng tira diidi'iimisaán aa faák, tsaxwaarén asma tlakweema iga tleehhaán.

¹⁷ As adoorihe muuneerén hamí i tíq, as kaangwí ilaarén na maa/umitiyé'.

¹⁸ Asma tloomár Siyoni kaa kilós geexáy, tawer i baraá tanguuwós wa harweeriirín.

¹⁹ Ala kuúng AAKOÓ MUNGÚ, an waawutmo kureeraá kureér, waawuti'iimarók in kumaamít ay qari sleémeero.

²⁰ Ahaá, atén mista gunqaarés ay kureeraá kureér? Waáy, mista kwáhh deelór yaariire?

²¹ Aá AAKOÓ MUNGÚ, atén ti amoorók i ki/is, daqaní atén ni ki/aán, atén ti adoodár aáng i ki/is.

²² Laqaá kuúng atén taa ló'wa sí'i? Kuúng atén tina ló'wa i búhhi?