WA/AA/I 4 - Biblía Axweesantá Hhohho' ar Mungú 2004

Múk Yerusalemu alaá gixsa kawa hayóh

¹ Xáy, adór sahaáburén ira boo/áy, adór sahaábu hhohhó' ira warqáy! Tlaa/aá hhohho' tsee/a ngaa tsataatiyé' baraá umuúqo loohiro.

² Na/aá Siyoni kudaá adór tlaa/aá tlaxo gawden, kudá' taa harafaár tawa adór sahaábú hhohhó' adór nira warqayé' niri adór xooslár tleei tleehhitiyé' tidá' taa tleéhh nee tleeusmo.

³ Tam tawer sleeme in ya/aa/án na/ii'ín ngiwa du'umiisi, ala muk'eé' in tawo xaraasl adór sakweluú baraá darma.

⁴ Afér na/aá ninakw aa kahaakát waxeero, i mak muruú /aymár firiiriná' ala heé gi qáw i kaahh.

⁵ Mukdá' muruú /aymár diihhooa gwaa /aay, hám daxta qwarko taa qaátl baraá lohdií alé. Kudá' taa umín kiri tsitamiís ar tlabaá sirda/aten, daxta naa baraá ufér xwaansláy watliyé'.

⁶ Sakwasleemár muk'eé' aa sláy ka ur, ta ak sakwasleemár múk Sodoma aa slayi, kudá' taa qororo'oós tam pa/ángw daba' kiri gáwtí tleesi kwaa slayká.

⁷ Geeraharuuseerós ka hhohho' ta tlaa/aá tluwaywo, ka /awak ta ilwaawo, slaqooín ki da/aten taa nyaányuwo, ki tsataari hho' adór tlaa/aá sirbo/.

⁸ Hám daxta nina bo/aa/ayé' adór wahaaso, tam sleeme baraá lohdaá urene kin tsatsahhanká, kaahartá slaqwa nee fadu tina oohiyé', nina kahaakahiyé' adór migír.

⁹ Múk amohhoó' a kudá' taa tsuú/ ar paánga ta kudá' qwari aa tsu/i, kudá' qwari aa ala looqaanuunúy as gár /ayma ngiwa dakuusiyé'.

¹⁰ Qoomaadá' muk'eé' kuwa hhaamiís, amuudá' gurtleemuú koomá' na/ii'ín awa kilá' ngina huminé' as kahhó' ngiwa /ayiya'.

¹¹ AAKOÓ MUNGÚ xarasleemaawós ngina laqán, buhhtaawós giri ku'uús, gixsár Siyoni gay ásltí oohiís, tam ihhafiirír gixsa gari /ák.

¹² Waawituú baraakaá yaamu gaa haratlinti'iiká, tam yaamuloouusér yaamu gaa haratlinti'ká, adór wakusmo dahma ngir aleesláy afkú gixsár Yerusalemuwo.

¹³ Tí sleémeero ina tleehharút as tlakweemaá aaruuseerós nee dakuúsár kaahamuuseerós. Inooínaadá' múk hhó' ngwa tawo tsu/iye' baraá tla/ángw gixsa.

¹⁴ Geeraharuuseedá' ina tongaanús baraá lohduú wa ale adór taampu, tina slasla/areesiyé' ar tseerdu, tam heé tlabaaín kwatiitaro gaa qiitl i kaahh.

¹⁵ Muu gina i tseeamín, ta kaahi, «Quutlé'! Kuungaásingá' slasla/aren, quutlé', quutlé'. Ma gaa kwatiitara'!» An gár tas múk haleleamiít nee oo tongaanuús. Múk xoordu iri oó', «Mukwí ayaarene u dahaasanaaká.»

¹⁶ AAKOÓ MUNGÚ, inósuú kilá' gina diyaá/, gi sangw male i qaytsimitiiká, kaahamuuse ka sangw malé ilaiwa/iiká, tam bariise ka gaárí xuuiiká.

¹⁷ Ilaarén naa buqanumitiyé' as alee/isaay kuwa daamaramaan, baraá dal'amaayerene xoorór ba/amisaro ti aleeslawaaká ana daamaramaán.

¹⁸ Wakusmo tina digir deliít, hi'iitanór baraá lohduurén kari harslaaqataán, alhhe'eesayrén niri tseewúy, deeloorén faaro gari ya/aán, asma alhhe'eesayrén naa hardáh.

¹⁹ Múk taa eehar ku ló'wa insláhh ta gwersuuwo, atén tina guús ay gawaá tlom'i, tay gigidiné' baraá darmuú wa alé.

²⁰ Kuduú iimu/úngw slafingwrén, kudá' taa iimbalaáx ar di/i nee AAKOÓ MUNGÚ, nguna baa'ar'ín ar oohiyé', kudá' tawa kaahaan, «Baraá xuumarose atén a tla/ángw xoordu un wa hootaán.»

²¹ Qwalaala/é' nee qaseesemé' daxta, kuungaá Edómu, kuungaásingá' yaamaá Usír hootá', ala xooslmoowuú sakwasleema kungu dirhúng i haniis sleeme as kuwa wata', tay oonimitá' tlabaahúng kay kwakwahhá'.

²² Kuungaá múk Siyoni, muxtár tlakweemaahúng aa fák, kuungá' daxta tundu baraá looháy mayká. Ala kuungaá Edómu, tundun muux as tlakweemaahúng, tlakweemaahúng gin geehhooees.