WA/AA/I 3 - Biblía Axweesantá Hhohho' ar Mungú 2004

Muxta nee hhu'u'uungw nee harahhifo

¹ Aníng a heé slahh'amaaye gaa slay ar hhartá xarasleemaawós.

² Mungú ina ar tláy iri kwaáhh baraá giwti dír gwa/aataaká.

³ Looeemaawo dakós guna tleés iwa slahhi, iri inkakií/ tlatla/aangw sleémeero.

⁴ Inós slaqwtaeé' nee kaahartaeene gina hifaafúy, nee fadueé' giri giqáy.

⁵ Ina harweér iri /amatseék ar slahh'amaaye nee tlarara/aay.

⁶ Ina iwiitís baraá giwti adór tuuár deelo gaa gas.

⁷ Ina harweér ar koo/i as kahhó' mawa kotsqoót, ina tseék ar piínguú iló'.

⁸ Tam aga /aa/amiimi as alee/isaay nguwa fiririim, ala inós firor'eé' axaasaro gana sií'.

⁹ Lohuueé' gina tuuntuúnk ar tlaa/aá taa dakuút, nee lohdueé' giri gaás.

¹⁰ Inós dir'eene a adór duúbuú gigdiím, adór dirángw aa nahhaat.

¹¹ Inós loohir'eé' gana qwaareés, iri tlaqaaqán, iri kilooeé' geexáy.

¹² Ga/aleerós gana uuruúx aníng iri qoomeés, adór dír i mahaangós ar qoomeesi.

¹³ Muunaáeé' guna tlaquút ar maheeraá baraá tlangasiirós.

¹⁴ Án a adór gár waaniqaay dír muu sleémeerowo, tlatla/aangw sleémeero aníng in kooyiná' ar daa'aangw.

¹⁵ Aníng slahh'amu iga baál, nee tlarara/aay iga gaás.

¹⁶ Sihhnaeé' giri tlaa/ér xoósl, niri baraá da/arár wa gwangwara'amiít.

¹⁷ Baraá muunaáeene wayda aa qwaár, adoodá' qwala/ i dirii'i aga gunqareés.

¹⁸ Naagáy niri oó', «Xirfuueé' nee harahhifor'eene naa faakiyé' dír AAKOÓ MUNGUHE.»

¹⁹ Slahh'amayer'eé' nee harweeriringw'eene bira insláw, án i ló'wa slahh'eemisiyá' adór saaxí.

²⁰ Muunaáeé' qooma sleémeero kaangwí gun inslasláy, nee aa haáts gurhaamiiro.

²¹ Tam adoorihe harahhifo an sláw gaarí wák bar aga insláw.

²² Sla'aarír warqawaaká ar AAKOÓ MUNGÚ i baloó fakká, gurtleemuuwós i baloó alhhe'eesoó konká.

²³ Muruuwí umuú looár tlawa ku /abén, inkihhimuuwós ku úr.

²⁴ Aníng ana baraaeé' oó', «AAKOÓ MUNGÚ an aalir'eé', gawaá adoorihe, aníng inós un harahhiíf.»

²⁵ AAKOÓ MUNGÚ ku hhoó' dír kudá' ngu harahhifita'a, ku hhoó' dír kudá' sleémeero ngu leelehhitá'.

²⁶ A gár hhoo' hee ba/amár AAKOÓ MUNGÚ ngiwa daamaaran ar qitla.

²⁷ A gár hhoo' hee qitla nguwa intsaatsahhi, iimír masoombi'iimarose.

²⁸ I kilós iwiiti, i dirósií xasliiti, barnaxes Mungú slahh'amuudá' guna haniís.

²⁹ I xupuui tam ay baraá teeri, iwa kaahi, doóqa harahhifo i deer.

³⁰ I ya/an tlaaqarmaawós kiwa muxi nee kudá' gu muúx, nee i ya/an kuwa tloqmiisi.

³¹ Asma Aako ti baloó kwahhiiká ay kureeraá kureér.

³² Ala timti gurhaamír ar aya, inós iqo gurtleemuú kón, ar har qoomoó yaareemaá sla'aarirós ar warqawaaká.

³³ Inós ga slaiiká muu nguwa slahh'eemiisi laqaá muu nguwa gurhaamír ar ay.

³⁴ Mukdá' sleémeero taa tsegiít baraá yaamuwo kuwa baramaanuusi,

³⁵ laqaá hariímár hee kawa warqeesi dír geeraá Kudá' Gáwtí diriia,

³⁶ laqaá axweesantá hee bara isa mút baraá kwasleemaro, Aako muruusíng gu slaiiká.

³⁷ Heé gaa ga oó' iri tleehharút a heemá bar Aako gaa ooiiká?

³⁸ Muruú tlákw nee oo hhoe dír ni daraahhi a baraá afkú Kudá' Gáwtí diriaakáhe?

³⁹ Ahaá waáy, gár heé slaáf is qununu/i burkwa muúx as tlakweemaawós?

⁴⁰ Luhduurén ki alqaytaán nee ki aldakwaán, nee ta ki/aán amór AAKOÓ Munguúrén.

⁴¹ Dabaarén nee muneerene gáwtí tleesare' amór Munguú doori.

⁴² Atén aga tlakweemisaán, aga dee/anutaán nee kuúng atén taa gurtleeriiká.

⁴³ Kuúng buhhtaawók ngina tsít, atén tiri eehát, tiri tsú/ ar gurtleemu wasle.

⁴⁴ Tina kilók uuntsís ar huunkáy adór firoorén uwa i hardatká.

⁴⁵ Atén tina adór xwaansláy tléhh nee tina sí' tla/ángw muko.

⁴⁶ Wakuuseerén sleémeero atén tina waaniqiín.

⁴⁷ Dae tlaqa nee bohoongw i dír geeraarén, amotlakwe nee hhituru'uuma taa sleér.

⁴⁸ Hhirhheeri baraá ilaaeene nin wa/aminá' adór duxa, asma muk'eé' kuwa qwaareés.

⁴⁹ Ilaaeé' in tawo wa/aminá' i lakmitiaaká, sleeme i hungu/umisiaaká,

⁵⁰ ay dír AAKOÓ MUNGÚ gawaá doori nay baráy qayti ngi ari.

⁵¹ Gurhaamír yaariir iga eér, kangwqá' ín aayo baraá gixsarihe kaa /imiís bura ár.

⁵² Aníng tina tawo adór tsir/ír wa slakaát nee wakuuser'eé' sleémeero.

⁵³ Inooín aníng ina slafi kwahhiyé' baraá bohoongw, iri baraadá' i tuntuukiyé' ar tlaa/e.

⁵⁴ Ma'aay án iri haraawa/iyé' niri oó', «Kaangw'eé' aa faák.»

⁵⁵ Aá, AAKOÓ MUNGÚ, án kuúng uri i /aá/ baraá gwe'eedaá bohóngw wa alé.

⁵⁶ Kuúng firor'eé' kari iiárií qás, niwa kah, «Iaawók mi oohaar bur alee/isáy fiririím!»

⁵⁷ Uwa ateét ina haratsewuúr iri beér, «Ma da'ayumitaar!»

⁵⁸ Aá Aáko, án kuúng iga aleekalá/, slafingw'eé' kuri ba/amís.

⁵⁹ Aá AAKOÓ MUNGÚ, kuúng tlakweemaá tinda aníng i tleéhh iga aán, kwasleemar'eé' tí tsatang ar hhooeemaawók.

⁶⁰ Kuúng li/oó wakuuser'eé' i bu'uun ugwa aán, nee muruuín kudá' tlákw i qoomeemeesiya' daanduueene.

⁶¹ Aá AAKOÓ MUNGÚ, kuúng /oosliislingw'ín ugwa axás, nee muruuín kudá' tlákw i qoomeemeesiya' daanduueene.

⁶² Axweesanay nee inslawoó wakuuser'eé' a daanduueé' kun axwees tlaatla/aangw sleémeero.

⁶³ Ga/aaweek, bir iwiiwitiyá' laqaá bir hi'iimitiyá' aqo aníng in kooyiná' ar daa'aangw.

⁶⁴ Aá AAKOÓ MUNGÚ, inooín bueek ar harqoomoó gadiyér dabaaín.

⁶⁵ Mune daktu'uweek nee ki lu'ús.

⁶⁶ Aá AAKOÓ MUNGÚ, inooín eehareek ar buhhtaawók, hhaamiiseek gawaá daanduú yaamuwo.