WA/AA/I 1 - Biblía Axweesantá Hhohho' ar Mungú 2004

Gurhaami as Yerusalemu

¹ Gixsarí geeraawo muko haats, adór ira kilós mét. Tidá' geeraawo ur baraá xoorduuwo, adór ira kwaali'ít. Inósadár dasír waawutmo baraá tla/ángw gixsaduuwo, adór ira adór kwaalo'o tleehhít.

² Inós xweeraawo in /aa/amaamiín as slahh'amu, hhirhheeri nin gororoxeeliná' gawaá tlaaqarmaawo, baraá tla/ángw sla'aaruuseerós sleémeero oo gaa gurkwa/as i kaahh tumu wák. Inós kaa al/aáy nee mulqeerós sleémeero, inooín naa wakuuseerós tleehhitiyé'.

³ Múk Yuda kwaa loohatís as slahh'eemis nee lawali'iimár xaraasl, inooín tan baraá tla/ángw xoorduú wa hoot, ala amohhooár ta slaslay i káhh. Inooín kaa ohín nee mukdá' gi eeharahár qoomár iwa baraá slahh'amuín i dirii'iya'.

⁴ Lohaá Siyoni i tsuunqumisiyá', as heé hardáh iwa kahhi bál deelór ure. Afér maraá gixsa aa tawo mét, kaahamuuseerós i baraá /ifór diren, /amaatliiteerós kaa hhiimbirtlín, nee gixsa i baraá slahh'amaayér diren.

⁵ Gixaarós kan baliit nee wakuuseerós, wakuuseerós aa slawiín, asma AAKOÓ MUNGÚ inós gana slahh'eemiís as tlakweemaawós kudá' yaariir. Na/iiwós wakuuse gira tleér baraá loohaay.

⁶ Xirif sleémeero oo múk Siyoni aa faák geeraharuuseerós aa adór saaragár qawo wasl tleehhít. Inooín nina /akumiitiye' awa /uuru wasl dír geeraá kudá' ngi eeharaahara'a.

⁷ Gixsár Yerusalemu deeloodár slahh'amuuwose nee tiqtirose muruuwós kudá' tlaxo gawdén i koon iimír aange guri insleér, qoomár mukós iwa huuhu'ún gawaá dabaá wakuuseerós, nee heé gaa tuu/ i kaahh. Inós kari waaqaseesén nee wakuuseerós, kari niqín asma huuamaawós.

⁸ Gixsár Yerusalemu tlakweemaá ur gaa tléhh, gawaá adoorihe iri slasla/aruúr. Mukdá' geeraawo gaa ilaiwawaa/ gaa waaqaá', as ngiwa /aankwets ariyé', tam adoorihe inós i baraá /ifo iri alií warqeér.

⁹ Slasla/aruuwós ku geehhoó', ala inós qwanaywós gu hhaslitká, gawaá adoorihe, huuamaawós ki ló'wa slasla/aar, heé gaa gurkwa/as i kaahh, inós i kat, «Kuúng AAKOÓ MUNGÚ, slahh'amuueé' i qayteek, asma wakuuser'eé' iga bál!»

¹⁰ Wakuuse daber'ín gaa looloqós, gawaá muruudá' sleémeero tlaxo gawdén. Inós xoordu gaa aán niwa daraahiya' didá' hhoohhoo', mukdá' kuúng taa sí' niwa dahiya' baraá alqaatír mukók.

¹¹ Mukós sleémeero i baraá /ifo, as tawa gár /aymár leelehhiiti, daqaari'iimar'ín ngin muruú /aymár ar tlaxún as tiwa tu/iya' i kaahiya', «AAKOÓ MUNGÚ, ti i qaytsit, asma atén taa waaqaá'.»

¹² «Kuungaásingaá hhayutuúse, qaytsité' nee ka aandá', xáy dirhunge a gaarookáhe? Ga/aawaak, heé gurhaamuút adór aníngár alé i deéro tidá' tinda gawaaeéní qaás, tidá' AAKOÓ MUNGÚ aníng iwa slahh'eemiís, baalaadár buhhtaawós kudá' xaraasla'a.

¹³ «Asma asla ngina gáwtá wa /aytiís, nee faduueé' giri al'ót. Tsaaxweeli gana geeraaeé' qaás as iwa ya'a' oohi. Aníng iri alií warqeés iri geexáy baraá dewa'ame, tlatla/aangw sleémeero a baraá /araama.

¹⁴ «Tlakweemaaeé' sleémeero gina burumburaarín, giri gawaaeénií qaás, giri dinkwárí tseék ar dakós, ngiri gawaá istaeéní tarereé', aníng iri al'iloouyé', Aako aníng iga qaás gawaá dabaá múk aníng tlaampa'aasaro ni aleeslawaaká.

¹⁵ «Aako slaqwaruuser'eé' sleémeero gana waaqasén, inós dinku'uuma gana ateét niwa amor'eéní haratleer, as kahhó' masoombar'eé' kawa hhaamisi. Aako múk Yuda guna kal/aa/án adoodá' sabiíbu kur kal/aa/an.

¹⁶ «Aníng hamí an /aa/amiím as kaangwí. Hhirhheeri baraá ilaeene in tawo wa/aminá', as heé aníng i gurkwa/ás kuwa saáw dir'eene, kudá' aníng i muunií qaás i kaahh. Na/iieé' kina kilooín geexáy asma wakusmo aa baalín.

¹⁷ «Múk Siyoni daba' gina gáwtí tleés as iwa alee/isoó firirina', ala heé gaa gurkwa/as i kaahh. AAKOÓ MUNGÚ hara'aya gaa oó' daanduú Yakobowo ar inslaawaywós iwa wakuuseerós tleehhiti, Yerusalemu aa gár slasla/aar tleehhít baraá tla/angw'ine.

¹⁸ «AAKOÓ MUNGÚ i baraá gan'amu, asma aníng axweesantós ana aáhh. Ala kuungaá muu sleémeero iia qaasaak, nee slahh'amuueé' ga/aawaak, dasuueé' nee daaqay'eene kira tláy baraá loohaay.

¹⁹ «Sla'aaruuser'eé' ana ateét ala aníng ina al/ayiyé', kaahamuuser'eé' nee bariiseero nina baraá gixsárí hhané', qoomár niwa muruú /aymár leelehhitiya' as tiwa tu/iya'.

²⁰ «Aá AAKOÓ MUNGÚ, ga/aaweek, adór aníng nir baraá slahh'amuú i dirií', guruueé' /ur/uri gwa eér, muuná i ló'wa amoqwaqwadín, asma aga ló'wa dee/aanuút. Baraá lohduuwo muu ku tsuu/, baraá do'o muu i qaatl.

²¹ «/Ifor'eé' ngiwa axaasiyé', heé aníng iga gurkwa/as i kaahh. Wakuuser'eé' sleémeero slahh'amuueé' nguwa axaasiyé', tidá' kuúng taa tléhh ngina saqwalaa/iyé'. Baalaadá' taa al'axwés ni hardat, tidá' wakuuser'eé' slahh'amuú adór kwe'eé' kwí nguwa sleer.

²² «Alók tlehhmi'ii'ín kudá' tlakw sleémeero nin geeraawók i hardihiyá' nee kiri sakwasleemút, adoodá' kuúng aníng ira sakwasleemút as tlakweemaaeé' sleémeero asma /ifor'eé' ka yaariir, nee muunaáeé' i /araarán.»