WARA'AMI 99 - Biblía Axweesantá Hhohho' ar Mungú 2004

Mungú a waawutmoó úr

¹ AAKOÓ MUNGÚ i waawuti'ii'ín, xoordu ni daaraxatiye'. Aa iwiít baraá tla/eeraá keruúbi, yaamu niri dingitiyé'.

² AAKOÓ MUNGÚ baraá gixsár Siyoniro ku úr. Xirfuuwós i gawaá daanduú xoordu sleémeero.

³ Inooín umuuwós kudá' úr oo dae tlaáq, nee kudá' hhoohhoó' ku sluufmiisi.

⁴ Kuúng, waawutmoó aleesleemuú koóm, kuúng barqaanti aga hiingés, slám sakwasleemár ganaa' ana tléhh, nee hotángw ganaá' nguna húp dír múk Israeli.

⁵ AAKOÓ MUNGÚ, Munguúrén, xirfayeemisaak, dír geeraawós i tumbarara'ataak! Inós an kudá' hhoohhoó'.

⁶ Mose nee Aroni sleeme an geeraharuuseerós ar saaliingw, tam Samueli a heé wák baraá tla/ángw kudá' AAKO ngwa firiirine'. Inooín sleémeero AAKOÓ MUNGÚ nguna i /aa/aminé' nee inós giri mu/aywaáts.

⁷ Baraá uhmooduú huunkiro ina axweés nee inooín, axweesantós nee kaahirós tidá' aa haniís kari óh.

⁸ AAKOÓ Munguúrén, kuúng an kudá' mukók ugwa mu/aywats, kuúng an Munguúduú gurtleemuú koóm dír mukoge, ala li/oó tlakweema un bu'uún.

⁹ AAKOÓ MUNGÚ, Munguúrén, xirfayeemisaak. Tumbarara'aaté' gawaá tloomarós tidá' hhoohhoo' wa ale, asma inós an AAKOÓ Munguúdá' Hhoohhoó'.