WARA'AMI 98 - Biblía Axweesantá Hhohho' ar Mungú 2004

Mungú a baalusmoó yaamu

¹ AAKOÓ MUNGÚ i daa'aak ar daa'ángw /abén, asma muruú waa/oo/amo guna tleéhh, ar dakós oo doó /iyayhe nee kudá' hhohhooe, inós iri baalín.

² AAKOÓ MUNGÚ baalirós gaa gwa/aateés, dír ilaá xoorduuwo gan'amuuwós gwaa laqán.

³ Sla'aarirós ar warqawaaká nee inkihhimuuwose ga insláy dír múk Israeliwo. Baraá yaamu sleémeero baalír Munguúrén kaa ár.

⁴ AAKOÓ MUNGÚ yaamu sleémeero ngu i baraa/iye', afo tleesaak, daaé' ar qwala/, xirfuuwós daa'aak.

⁵ AAKOÓ MUNGÚ xirfayeemisaak ar daa'ángw gidaandoori, i daa'aak ar afór gidaandoori.

⁶ AAKOÓ MUNGÚ Waawutmoorén i ururu'umisaak, i baraa/aak ar tarumbeéta nee afór xareemaá gwaandaawe.

⁷ Tlawi ni haratleer nee muruudá' baraawós i diriia, yaamu i daaiye' nee kudá' baraawós wa hootá'.

⁸ Alwuo tsa/i'i ngi tahh, tlom'aá ninakw i dír wák wa daaiye' ar qwala/.

⁹ Baraa/é' dír geeraá AAKOÓ MUNGUHE, asma ni hardah as yaamu ngiwa sakwasleemuuti. Xoordu sleémeero gin sakwasleemár i tleehh ar gan'amu. Gin sawaawuti'ín ar barqanti wasle.