WARA'AMI 97 - Biblía Axweesantá Hhohho' ar Mungú 2004

Mungú a baalusmoó úr

¹ AAKOÓ MUNGÚ i waawuti'ii'ín, yaamu i qwalaala/iye', yaamudaá baraá tla/eeraá tlabeemo i qwalaa/iye'!

² Huunkoó bó/ oo qoomár ma/mi Aakoó Mungú gwaa harweér, hhooeema nee sakwasleemár ganaa' an iimu/úngw waawuti'iimarós.

³ Asla i geeraawós wa hi'ít, nee wakuuseerós tidár tsuf'i sleémeero asltidá' giri xaawuúr.

⁴ Mankartós yaamu gin gwa/atís, yaamu ngiri ariyé' nee tari daaraxaat.

⁵ Tlom'i niri weeqiyá' adór boohhayaangw dír geeraá AAKOOWO, dír geeraá Aakoó Munguú yaamu sleémeero.

⁶ Doori hhoeemaawós ngi alki/iitiyá', nee xoordu sleémeero xirfuuwós ngun ariyá'.

⁷ Kudá' sleémeero awa munguiidaá hatlá' awa murslaaqat ngi haratlintaatiá' ki mureekees, kudá' sleémeero slaqsa'aá munguaá hatlá' ngir diiduusá'. Munguaá hatlá' sleémeero nin tumbararaa'atiyá' dir geeraá Mungú.

⁸ Múk gixsár Siyoni kari axaas tay qwalaa/, múk Yuda i baraa/, asma sakwasleemár Mungú.

⁹ AAKOÓ MUNGÚ kuduú Aleesleemusmo, kuúng tu úr baraá yaamu sleémeerowo, kuúng tu iia tleér ta munguaá hatlá' sleémeero.

¹⁰ AAKOÓ MUNGÚ múk tlakweemaá ahhiít gu slaa', slafíngw heé hhoohhoó' gun xún, gin tuu/ gawaá dabaá múk tlakuuseero.

¹¹ Heé hhoó' gwa/aateema ngu i gwa/aatiyá', múk tsaén baraá muner'ine tay qwalalaa/.

¹² Kuungaásingaá hota ganaa'á', AAKOÓ MUNGÚ saqwalala/aak, nee umuuwós kudá' hhoohhoó' sluufmamisaak.