WARA'AMI 96 - Biblía Axweesantá Hhohho' ar Mungú 2004

Mungú a waawutmoó úr

¹ AAKOÓ MUNGÚ daa'ángw /abén i daa'aak, yaamu sleémeero AAKOÓ MUNGÚ i daa'aak.

² AAKOÓ MUNGÚ i daa'aak, umuuwós diidi'iimisaak, ba/amaarós alki/iitaak umuú deelooro.

³ Kángw xirfuuwós alki/iitaak dír xoordu, kángw tlehhmi'iiwós awa waa/oo/amór koomá' alki/iitaak dír muu sleémeero.

⁴ Asma AAKOÓ MUNGÚ ku úr nee uraywós ku xirfayeemisi ló'wa ale, inós ku ilaiwawa/i taa mungui sleémeero.

⁵ Asma mungui sleémeero awa muu a gadiyér dabaaín, ala AAKOÓ MUNGÚ an kudá' doori gaa tleehh.

⁶ Ilaiwa/ame nee aleesleemu i dír geeraawós i dirii'iyá', /uuru nee hhohhoaari i baraá do'ós kudá' hhoohhoó'.

⁷ Muu sleémeero AAKOÓ MUNGÚ ngu sluufmiisi, xirif nee aleesleemu amoorós ti hanise'.

⁸ Xirfuú umuú AAKOÓ MUNGÚ hanisaak, ilahhooa huwaare' ta datá' baraá Do'ós.

⁹ AAKOÓ MUNGÚ diidi'iimisaak ar hhohhoartá xirfuuwós, yaamu sleémeero daraaxé' geeraawose.

¹⁰ Xoordu ádbawaak, adór AAKOÓ MUNGÚ tar baalusmo, yaamu kaa tlehhma hhe'eés, kiri /atleés as iwa daaraxatiaaká, muu gu sakwasleemuut ar adór ganaa'.

¹¹ Doori i qwalaa/iye' nee yaamu i baraa/iye', tlawi i xuuru' nee muruú baraawós i diriia'.

¹² Qamu i baraa/iye' nee muruú baraadí diriia, xaa'aá sla/a sleémeero i daaiye' ar qwala/,

¹³ dír geeraá AAKOÓ MUNGÚ, kudá' hardáh. Asma inós ni hardah as yaamu ngiwa sakwasleemuuti. Yaamu gin sakwasleemuut ar gan'amu, xoordu sleeme gin sakwasleemuut ar adór qoom dirose.