WARA'AMI 94 - Biblía Axweesantá Hhohho' ar Mungú 2004

Mungú a sakwasleemusmoó muu sleémeero

¹ AAKOÓ MUNGÚ, Munguú li/oó bu'uúm, kuúngudá' li/oó bu'uúm ti laqaan.

² Kuúng an kudá' muu sleémeero gu sakwasleemuút, sihhiitáng, múk dara/aám sakwasleemuuteek adoodá' inooín wa hariim.

³ AAKOÓ MUNGÚ, ay xaylá múk tlákw ta qwal/aa/ati? Ay xaylá, xáy AÁKO?

⁴ Inooín tan axwees ar daara/aangw, tlakuuse sleémeero tin kilooín xirfayeemisiyá'.

⁵ AAKOÓ MUNGÚ, mukók kun naasúy, mukók kuduú aalirók ar kilá' kun baramaanuus.

⁶ Inooín ta kwaeelaá tsuu/ nee dahaayeero, panaay kun tsuu/ sleeme.

⁷ Ta kaahi, «AAKO i xumiisiiká, Munguú Yakobo gár i tsaahhi i káhh.»

⁸ Muk'eé', ahaá ay xaylá kuungá' tsaahha ka sleera'? Ahaá, daktána, ay xaylá kuungá' qeeru ku sleera'?

⁹ Kudaádá' iia gaa tleehh, i axaasiikáhe? Kudaádá' ila gaa tleehh, i xumiisikáhe?

¹⁰ Kudaádá' xoordu gi sawaawuti'iím, xáy, muxtaaro gi aleeslaykáhe? Inósuduú múk intsaahhatimís sagalooaro,

¹¹ AAKOÓ MUNGÚ inslawoó hee gu xuu', adór tar gár tawo.

¹² AAKOÓ MUNGÚ, heé amohhoó' a kudá' kuúng taa naanáq, kudá' dabeeroge ta intsaahhatís.

¹³ Kuúng un hungu/uumií hanís deelór slahh'amaayeero ay dír bohóngw heé tlaákw gu óh, foolaaro kway hhe'eesi.

¹⁴ Asma AAKOÓ MUNGÚ mukós gu mayká, aalirós ga gunqareesiiká.

¹⁵ Sakwasleemár ganaa' i ki/, sleémeero kudá' hota ganaa'á' ngi eehariyá'.

¹⁶ Xáy, heé bartaeé' ngi áw a heemá qoomár múk tlákw bura siaán? A heemá heé gayuueé' dír múk tlakweemaá tlehhiita?

¹⁷ AAKOÓ MUNGÚ bira alee/isiiká, aníng geera aga qaroó /eét baraá gi'i ar gaanslaay.

¹⁸ Aníng niwa oó', «A huuhu'uúm,» sla'aarirók ar warqawaaká ina gáwtí koón, AAKOÓ MUNGÚ.

¹⁹ Muunaáeé' amoqwaqwadiingo bira buúhh, aníng kuúng i gurkwa/ás nee in qwal/amís.

²⁰ Xáy, geeraharusmoó /aytusmo nee kuúng an dinku'usá'a? Kudá' hara'ayár gan'amuú koomaaká ngi qamiimá'?

²¹ Kudá' múk ganaá' gu tsu/utár wa slaá', kudá' múk dakuús wásl gu sakwasleemár gwa'arár i tlaáq.

²² Ala AAKOÓ MUNGÚ a koo/ir'eé' ar gawit, Munguúeé', tlaa/ar'eé' ar ni i gogoow.

²³ Tlakweemaaín kudá' i tlehhahhitiya' gin gawaaínií ki/is. Inooín kin hhaamiis as tlakweemaaín. Eeít, AAKOÓ Munguúrén gi qwaarees.