WARA'AMI 90 - Biblía Axweesantá Hhohho' ar Mungú 2004

KITAÁBUÚ TSIYÁHH ( War 90—106 ) Mungú nee hee

(Firór Mose, heé Mungú)

¹ AAKOÓ MUNGÚ, kuúng an dír hotaarén awa qari sleémeero.

² Tam qoomár tlom'i kiwa tlehhká. Tam qoomár yaamu kiwa tlehhká, kuúng an Munguú daadáw iimír iimu/ungw wasle ay alhhe'eesay wasle.

³ Hee un ki/ís baraá hhapeérií alé, bara ó', «Kuungá' muu, ki/é' baraá hhape amoodá' ta dahha'.»

⁴ Dír kuunge kureeraá kumuú wák a adór looár wák kilós, adór baalaadár /isá' aa waarahh, a adór xweeraá looár wák.

⁵ Kuúng muu un qwaarés inooín a adór tlata, adór gitsór naa/ matlaatleero,

⁶ tidá' matlaatleero harmaa/ iri /ayús, nee tsiindoowo iri /óts nee iri kát.

⁷ Asma atén ta hhaamiís nee buhhtaawók, buhhtaawók atén ti dae tlaqiyá'.

⁸ Tlakweemaarén ki geehhoo' diroge, tlakweemaá baraá naaqo naa geehhoouyé' baraá gwa/aateemaawoge.

⁹ Deeloorén sleémeero aa waaráhh baraá buhhtaawók, kureeraá slafingwrén niri faakiyé' adór hiinsla.

¹⁰ Kureeriirén a kureeri mibeeraá faanqw, laqaá birti slaqo hhó' a mibeeri dakaát. Ala waayaaqamuú yaariír un ar hootaán, deelo i kwahhmiská atén aqo an gaanslár tlawaán.

¹¹ A heemá heé buhhtaawók tsaahharo gi aleesláw? Adoodá' kuúng tur da'ayuumiti an adoodá' buhhtaawók ngir tsaahhiya'.

¹² Gawaá adoorihe atén ti intsaahhatis faarór deelór hotaarén kawa xuaan, as kahhó' sagalooa kawa koomaan.

¹³ AAKOÓ MUNGÚ, buhhtaawók i kumaamitir ay xaylá? Ki/áng sagadiyuuseerók gurtlaweek.

¹⁴ Sla'aarirók ar warqawaakahe ti hatsis matlaatleero, as kahhó' atén uwa sabara/aan nee uwa saqwalaala/aan baraá hootangwrén sleémeero.

¹⁵ Daxta kureeraá yaariir awa qwala/ huwang, ar adoodá' kureeraá slahh'amu nee waayaaqamu ngira hanís.

¹⁶ Tlehhmi'iiwók laqaameek dír sagadiyuuseeroge, na/ii'ín xirfuuwók kudá' úr ngu ariye'.

¹⁷ AAKOÓ MUNGÚ, Munguúrén, masók hhohhoaarirók i gawaarén i dirí', gadiyér dabaarén ya/ameek, kuúng gadiyér dabaarén ka kwa/ás.