WARA'AMI 9 - Biblía Axweesantá Hhohho' ar Mungú 2004

Ilahhooa

(Wara'amtá Daudi)

¹ AAKOÓ MUNGÚ, aníng kuúng un sluufiís ar muunaáeé' sleémeero. Tlehhmi'iiwók sleémeero awa waa/oo/amo i alki/iít.

² Munguú Gáwtí dirií', án kuúng un sa qwalalaá/ nee un sa baraá/, umuuwók un xirfayeemiís ar daa'aangw.

³ Wakuuser'eé' iwa alií kí/, ina huuhu'uún iri hhaán geeraawók i alé.

⁴ Aníng iga sakwasleemár i tléhh ar gan'amu, aga iwít gawaá kitángw aleesleemu sakwasleema kawa tlehh ar gan'amu.

⁵ Xoordu iga iigahhamít, tlakuuse kari qwaarés. Umer'ín ana fíts tay alhhe'eesay wasle.

⁶ Wakuuse aa hhaán ay alhhe'eesay wasle, nee gixsaduín kiri hhitiín, inooín kay gunqaareés baraá inslawaywo.

⁷ Ala AAKOÓ MUNGÚ in waawuti'ín ay alhhe'eesáy wasle, kitaangós oo waawuti'iima gwaa qaás as sakwasleema.

⁸ Inós múk baraakaá yaamu gun sakwasleemuut ar gan'amu. Muu gu sakwasleemuut ar barqaanti wasle.

⁹ AAKOÓ MUNGÚ an baqmoó dír kudá' ta hara/untsina, an baqmór'ín qoomár slahh'amuuwo.

¹⁰ Kudá' kuúng u xuá' u harahhifiyá', asma kuúng, AAKOÓ MUNGÚ, kudá' kuúng u leelehhiitá' iga meeriiká.

¹¹ AAKOÓ MUNGÚ gawaá Siyoni sa daa'aak, tlehhmi'iiwós alki/iitaak baraá tla/ángw muko.

¹² Asma Munguúduú li/oó tseerér liitlakuuse ga bu'uúm, inooín gi inslasláy. /Aa/eeín gi gunqaaresiiká.

¹³ AAKOÓ MUNGÚ, án gurtlawáng, qaytsiít slahh'eemisuú tir slahh'eemisi nee kudá' aníng i ahhiitá'. Kuúng an kudaádá' aníng i ki/ís dír afkuduú bohóngw gwa'araaro.

¹⁴ Asma xirfuuwók sleémeero nguwa alki/iit, dír afér gixsár Yerusalemuwo. Ba/amarók an sa qwalaalaá/.

¹⁵ Xoordu naa /eetiyé' baraá baudá' naa fooliyé'. Tsaaxweelay'ín kudá' naa qaasiyé' ya'aaín gaa ohín.

¹⁶ AAKOÓ MUNGÚ taa geehhoeés, sakwasleemarós gaa boo/eés, tlakuuse gaa óh ar gadiyér dabaaín.

¹⁷ Tlakuuse amór i keer a baraá gi'i, tam múk xoordu kudá' Mungú ngwa gunqareesiye' sleeme i amoodá' kayá'.

¹⁸ Mungú narkutmo gu baloó gunqareesiiká. Harahhifór múk liitlakuuse i baloó qwatká ay alhhe'eesay wasle.

¹⁹ AAKOÓ MUNGÚ, kuúng sihhiít, hee miwa /uuru sláy. Kuúng múk xoordu sakwasleemuuteek.

²⁰ AAKOÓ MUNGÚ, muu na naxweek, xoordu ti xuiye' inooín a gaarooká, a múk tawo.