WARA'AMI 88 - Biblía Axweesantá Hhohho' ar Mungú 2004

Firo as alee/isaay

(Daa'aangw. Wara'amtá daaqoó Kora. Wara'amtá intsaahhatimiis, ar Hemani aa daá', heé tlahhoó Esra)

¹ AAKOÓ MUNGÚ, ba/amusmooeé', tlaatla/aangw nee xweeraawo án kuúng un i /aa/amiím.

² Firor'eé' axaaseek, /aa/ee'eé' iiárií qaaseek.

³ Slahh'amuú yaariír iga sláy, tsaxwá aníng niwa gwaa'.

⁴ Aníng taa harafaár dinkwa nee múk afkú bohóngw gwa'arár i dirií', /uuruueé' sleémeero aa faák.

⁵ Aníng taa kwaáhh baraá tla/ángw tu'u, adór tuaá dír /aantií diriiá', kudaádá' kuúng ta baloó insleeraaká, kaa saweés diroge.

⁶ Aníng kuúng iga /aytís baraá baa'ár aa tser'et, baraá bohóngw saáw nee oo giíw.

⁷ Buhhtaawók iga al iiloouyé', buhhtaawók iga slahh'eesiyé' adór gwaanduú ma'aay.

⁸ Iga parátl dír mulqer'eene, aníng aga adór gár dae tlaaq tleehhiít dir'ine, taa baraá dó' ii tseék, tam adór nir kotsqoot i káhh.

⁹ Ilaaeé' naa maa/uutiyé' as slahh'amaaye, AAKOÓ MUNGÚ, kuúng umuú deeloro un i /aa/amaamiím, ugwa dabaaeénií tleés.

¹⁰ Ahaá, kuúng muruú waa/oo/amo uqo tléhha dír múk aa qaatl? Ahaá, gi'i niqo tlayá'a as uwa xirfayeemisiya'.

¹¹ Ahaá sla'aarirók ar warqawaaká kaqo alki/iíti dír /aantaaro? Laqaá inkihhimuuwók kuqo kaáhi dír ta hhitini?

¹² Xáy, waa/oo/amoorók kaqo xúi baraá giwtiro? Laqaá hhooeemaawók kiqo geehhoóe dír múk taa gunqareesi?

¹³ Ala AAKOÓ MUNGÚ, aníng kuúng un i /aa/amiím, umuúqo matlaatlér xawa un fiririím.

¹⁴ AAKOÓ MUNGÚ, asma milá misa amór saáw i kwáhh? Ahaá, masa aníng wa nahhát?

¹⁵ Iimír masoombi'iimar'eene slahh'amu una /aa/aáy tsaxwaá gwa'ara in wa /akumaamiít. Aga ló'wa slahhaá' as muxtaarók.

¹⁶ Buhhtaawók kudá' xaraasla'a iga aldaa/atuúr, haratlatlangók kuduú /uuru i dae tlaaq nee i hariiáy.

¹⁷ In harwedít adór ma'aá wa/amiimá' tlaatla/aangw sleémeero, nee aníng iga /amaatsék bihhe sleémeero.

¹⁸ Kuúng aníng iga parátl dír mulqer'eene nee sla'aaruuser'eene, gár dáw a giwti kilós.