WARA'AMI 85 - Biblía Axweesantá Hhohho' ar Mungú 2004

Firo as diihhooár xooro

(Wara'amtá daaqoó Kora)

¹ AAKOÓ MUNGÚ, yaamuuwók iga wangexwát, slám Yakobo ugwa hariímarós tida' hhoo' i ki/ís.

² Tlakweemaá mukók iga gurtleér, tlakweemaaín sleémeero iga hingés.

³ Buhhtaawók sleémeero iga ilá/, mune sleémeero aga gú/.

⁴ Atén ti qwats, aá Mungú, ba/amusmoorén, buhhtaá ta koon daandeemoorene hingeeseek.

⁵ Tin ii buhhahhiínda ay alhhe'eesay wasle? Xarasleemawók i kumaamitiía umuúqo qarto?

⁶ Xáy, kuúng slafíngw /abén ngu hanisakáhe malé ale, as mukók nguwa sa qwalaala/i!

⁷ AAKOÓ MUNGÚ, sla'aarirók ar warqawaaká atén i laqaamang, atén ti ba/amis.

⁸ Aníng masók a axaás adór AAKOÓ MUNGÚ i ooi. Asma wayda gu oo' dír mukós i ale, dír mukós kudá' hhohhó', kudá' naa warqaye' amoorós.

⁹ Ar ló', ba/amarós ka tseew dír mukdá' inós gu ilaiwawaá/, xirif i gawaá yaamuurén wa hooti.

¹⁰ Sla'aarír warqawaaká nee inkihhimu ti doogiyá'. Gan'amu nee wayda ti ma'amisiyá'.

¹¹ Inkihhimu ni harmaa/ baraá yaamuú wa ale, nee gan'amu ni harqaytsiit gawaá doorií wa ale.

¹² AAKOÓ MUNGÚ slaslawár yaariir ngi haniis, nee bu'úngw yaariír u slawaán baraá yaamuurén wa ale.

¹³ Gan'amu geeraá Mungú gi haar, nee loohír waarahhamuuwós gari amohhe'ees.