WARA'AMI 84 - Biblía Axweesantá Hhohho' ar Mungú 2004

Qwal/amaayér baraá Doó Mungú

(Wara'amtá daaqoó Kora)

¹ Dír hootawók i ló'wa sla'atimis, AAKOÓ MUNGÚ Aleesleemusmo!

² Aníng do'ók u ló'wa slaá', AAKOÓ MUNGÚ. Muunaáeé' nee slaqwte'eé' kuúng u saqwalaala/iyá'.

³ Siikáy do'ós sleeme gwa tleéhh, nee pareeqamo do' gwa sláy oo i qanhhuusi, bihhaá kitangwduú ilahhooarók kawa hanmamisa', AÁKO Munguú Aleesleemusmo, waawutmooeé' nee Munguúeé'.

⁴ Kudá' hootá' baraá do'ók wa ale i amohhooár koná', i kuúng xirfayeemisiyá' daqisleém.

⁵ Múk amohhoó' a kudá' /uuruín amoorók daáhh, kudá' Siyonír sla'á' kakaango.

⁶ Qoomár bar taa waaraahh baraá xatstá kaahaar ar ta bay Baka, didá' iri kutltá ma'aay tleehhít, tluwoó saxi ga tlahheesií tleehh.

⁷ I kumiitiyá' /uuru slaslaango, ay dír umuúqo heewo i hardihi dír geeraá Mungú amoodár Siyoni.

⁸ AAKOÓ MUNGÚ Aleesleemusmo, firor'eé' iiárií qaaseek. Munguú Yakobo, án iiárií qaasáng.

⁹ Aakoó Mungú, kuúng baqmoorén i qaytsiteek, waawutmoodá' kuúng taa tsawát i qaytsiteek.

¹⁰ Looár wák dír do'oge ka afhhamít, ta hotaá deelór kumér yaariire awa dír hatlá'. A tsiní bar aga sihhimiít dír afkú Doó Mungú wa ale, ta niwa hoota baraá maraá múk tlákw wa ale.

¹¹ Asma AAKOÓ Munguúrén an gwa/aateema nee an adór gaamboót, AAKOÓ MUNGÚ gurhhooa nee xirif gi kón. Inós ku hhoó' dír mukdaáduú gan'amuú kooma.

¹² AAKOÓ MUNGÚ Aleesleemusámo, heé kuúng u harahhiíf ku amohhoó'.