WARA'AMI 83 - Biblía Axweesantá Hhohho' ar Mungú 2004

Firo as wakuusér múk Israeli kawa arba/i

(Wara'amtá Asafu)

¹ Aá Mungú, kuúng ma xasliitaar, Aakoó Mungú, kuúng ma dirógií xasliitaar.

² Asma qaytsiít, wakuuseerók aa leexwaandút, nee kudaádá' kuúng u ahhiitá', i xoongír tleemisiyá'.

³ Mukók ku baramaanír wa slaa' ar naaqo. Mukók kudá' ta xuun ku gigdín.

⁴ I kaahiya', «Qwalaas, xooror'ín a hhaamisaán, masók umkuú Israeli ku inslayká!»

⁵ Taa kaahi slayé' ar muunuú wák, nee tiri dabe oohiyé' as tiwa tlaampa'aasiya' nee kuúng.

⁶ Inooín a múk Edomu nee oo Ismaeli, múk Moabu nee múk Hagari,

⁷ múk Gebali, múk Amoni nee múk Amaleki, múk Filisti nee múk yaamaá Tiro.

⁸ Tam múk Ashuru taa dinku'uús nee inooín, as bartaá xwaylár Loti kawa ay.

⁹ Tidá' taa tléhh dír múk Midianíri alé, nee dír Sisera nee Yabini, didár yaaér Kishonír wa ale, dir'ín tii tlehh.

¹⁰ Kudá' naa hhané' baraá Endórír wa ale, nee tu'uuín nay naasuutiyé' yaamií alé.

¹¹ Dír waawitúine tleehheek tidá' taa tléhh dír Orebu nee Se'ebu, waawitáín sleémeero masók tari adór Seba nee Salmuna,

¹² kudá' naa ooiye', «Yaamaá Mungú i koorén tleehhaán.»

¹³ Mungú, inooín diyaa/eek adór teerír wa ale, adór hhaanslaá tar tlatlay nee bambaao,

¹⁴ adór asltá darmuú /aay, adór tsángw asla oo gawaá tlom'i.

¹⁵ Kuúng guuseek ar tlaftá tlaakw, nee dae tsateek ar bambaaór ur.

¹⁶ AAKOÓ MUNGÚ, kuúng mureekeeseek, as kuúng uwa leeleehhiya'.

¹⁷ Ki mureekeesi nee i amoqwaqwadine' daqisleém, i mureekeesuutiye', nee i hhane' ar mure waslaay.

¹⁸ Ngi tsaahhiye' adór kuúng AAKOÓ MUNGÚ, kuúng kilók tar Munguú úr baraá yaamu sleémeero.