WARA'AMI 81 - Biblía Axweesantá Hhohho' ar Mungú 2004

Mungú i daa'aak ar qwala/

(Wara'amtá Asafu)

¹ Mungú baqmoorén i daa'aak ar afór ur, Munguú Yakobo sabaraa/aak.

² Daa'ángw wara'ami oohaak, mataári slahhaak, gidaandoorír afo hhohho' nee seése slahhaak.

³ Tarumbeéta ufahhaak qoomár slahhaangw bir ni ti'imiit, qoomár slahhángw hoomoowo, deeloorén tidá' ure.

⁴ Asma a dawa dír múk Israeliro, a hara'ayár Munguú Yakobo.

⁵ Asma hara'ayaarí gana oó' tawa lamabu'uungw dír Yosefuwo, iwa tláy baraá yaamaá Misrír wa ale. Afór heé ni xuaaká ana axaás.

⁶ Huwaá gawaá suumarók ina aweeriís, lakwantír gawaá dabaawók ngiri hingeés.

⁷ Qoomár slahh'amaayeero ina atét, uri ba/amís, una mu/aywaáts baraá lu/aaroó mankarto, una iiár dír ma'aá Meribár wa ale.

⁸ Muk'eé' án iiárií qaasaré', aníng kuungá' nu gurbuú'. Alók geeraawo a gár hhoo' diroge bar aníng iga iiárií qás.

⁹ Gár taa tleéhh ar slaqsoó Mungú ma sluufisaar, tam sleeme ma i tumbararaa'ataar.

¹⁰ Aníng an AAKOÓ MUNGÚ, Munguúwók, kudá' ugwa tsa/aas baraá yaamaá Misrír wa ale. Kangw'eé' axaaseek, daqaní án kuúng u tsuúq.

¹¹ Ala muk'eé' afor'eé' ngaa axaasi'iiká, tam múk Israeli i slaiiká.

¹² Gawaá adoorihe aníng ina máw tawa tlay ar adoodá' inooín i slaiya', nee ar baraá hara'ayduín.

¹³ A gár hhoo' geera bar muk'eé' kangw'eé' ngwa iiárií qaás, nee múk Israeli bar loohir'eé' ngaa slaiyé'.

¹⁴ Geeraawo alók wakuuser'ín aga baál ar gaanslaay, nee geeraawo wakuuser'ín aga daásl ar dakw'eé'.

¹⁵ Geeraawo kudá' AAKOÓ MUNGÚ ahhiitá' ni tumbararaa'amiitiyá' dír geeraawós i alé, nee slahh'amuuín qooma sleémeero in kumamiti ay alhhe'eesay wasle.

¹⁶ Kár ee, aníng geeraawo kuúng ugwa /aymiís ar angaánoó hhó'. Nee geeraawo un /aymiís ar danuú baraá pa/mír tlaa/a.