WARA'AMI 78 - Biblía Axweesantá Hhohho' ar Mungú 2004

Mungú nee mukós

(Wara'amtá intsaahhatimiis ar Asafu)

¹ Kuungaá muk'eé', intsaahhatisar'eé' iiárií qaasaak, axweesanoó afkwe'eé' daáhh na ohiimaak.

² Afkwe'eé' un waatleés niwa axwees ar slaqsi'i, as lu/aaráyduú qaro nguwa oo'.

³ Muruudá' taa axaasaán nee kuri xuaán, kudá' baabi'iirén naa alki/iitiyé',

⁴ kaangwí u duquumanaaká dír na/iirene, tam qartaá aluú wa xaw ka kaangwí bawaán, xirfuú AAKOÓ MUNGÚ nee /uuruuwós, nee muruuduú waa/oo/amo oo aa tleéhh.

⁵ Asma axweesantós gana gawdeés dír múk Yakobo, nee dabe gana qaás dír múk Israelí alé, tidá' aa alqadín dír baabi'iirén, as na/ii'ín kiwa intsaahhatisi,

⁶ as kahhó' qartá aluú wa iitlaw, kudá' taa laqwaliiká ngiwa intsaahhatisiya', inooín sleeme na/ii'ín ngiwa xu'utimisiya' kaangwihe.

⁷ As inooín Mungú kuwa harahhifor'ín i qaasi, tlehhma'aá Mungú mingiwa gunqareesiyé', ala hara'ayaarós ngi oohiye'.

⁸ Eeít, matawa adór baabi'ii'ín tleehhiít, qartá sagegawden nee ar aa dee/aanut, qartá baraá muner'ine Mungú gu gaárí xuaaká, ta inkihhimuú konká amór Munguhe.

⁹ Múk Efraimu oo ga/aldaá koóm, oo maheerír tlaquút, bál slaqwaraaro tana alií kií/ tari goów.

¹⁰ Asma alqadór Mungú ngaa oohi'iiká, ala nina si'iyé' dabeerós kawa eehari.

¹¹ Tlehhmi'iiwós kiri gunqaareés, nee muruuwós kuduú waa/oo/amo aa laqán.

¹² Dír geeraá baabi'ii'ine muruú waa/oo/amo guna tleéhh, baraá yaamaá Misri baraá qamaá Soani.

¹³ Tlawi gana qasiís, inooín giri baraadár waarahhaás, ma'aay giri sihhtís adór koo/i.

¹⁴ Tlaatla/aango giri geerahaár ar huunki, nee xweera sleémeero ar gwa/aateemaá adór asla.

¹⁵ Tlaa/aá uren gina feehhamiís baraá xaanxáy wa ale, giri wahaás ar ma'aá yaariir adór ma'aá baraá ilo.

¹⁶ Inós ma'aá yaariir ngiwa baraá tlaa/ár wa duúx, nari wa/iyé' adór yau.

¹⁷ Tam adoorihe inooín tlakweema tlehhtuwo nari kumiitiyé', kudá' gáwtí dirií' nguna si'iyé', didár baraá yaamaá xaanxáy wa ale.

¹⁸ Baraá muner'ine Mungú nguna iiaraa'ariyé', ar muruú /aymár ta slai nguwa iinuusiya'.

¹⁹ Mungú kuri biibisín tawa kaahi, «Xáy, Mungú muruú /ayma baraá xaanxaywo gu aleesláya amohhe'eesaro?

²⁰ Qaytsiít, tlaa/a gana slaáhh, ma'aay nari wa/iyé', yau nari hatsiyé'. Ala muruú /ayma haniisaro ngu aleesláya? Tam fu'unaay sleeme gi mukós i sláya?»

²¹ AAKOÓ MUNGÚ ngiwa axaás, iri qaa/iít buhhtaawo, buhhtaawo iri daa/atúy adór asla amór Yakobo i ale. AAKOÓ MUNGÚ iri faakamiís buhhtaawo amór Israeli i ale,

²² asma Mungú nguwa haratlinti'iiká, tam aleesleemuuwós oo ngiwa ba/amisi nguwa harahhifi'iiká.

²³ Ala tam adoorihe huunkoó doori guri gáwtí ádbáy, doori nay gweeritiyé'.

²⁴ Inós muruú /aymaadá' ta babay maána, nguna gawaá doorií wa paahhamiís as inooín nguwa /ayiya', muruú /ayma nguna gáwtá wa haniís.

²⁵ Hee muruú /aymár malayke guri /aáy, muruú /aymár yaariír guna amor'ín i huúw.

²⁶ Fur'ár da/aá daahh gana gawaá doorií gan'aás, nee fur'ár basa gari geerahaár ar aleesleemuuwós.

²⁷ Gina fu'unaá yaariír i paahhamiís awa adór ufér hhasaangw, tsir/ór hhampe'eeraá koom, ar adór hhasángw afaá tlawi.

²⁸ Tsir/oodá' gana /aytimiís baraá tla/eeraá xafay'ín, bihhe sleémeero ar wa/angwduú hotangw'ín.

²⁹ Tari /ayín tari ló'wa aáx, asma Mungú muruudá' inooín ta iinuusi guna haniís.

³⁰ Ala tam qoomár tawa dír /aymaárií dirii'i, muruú /ayma iwa gawaá afer'ínií kahhi,

³¹ Mungú iri ló'wa buúhh as inooín, kudá' /uureemaá koomá' giri tsuú/, masoombár Israeli gari daásl.

³² Tam adoorihe inooín tari ak buúhh tlakweema tlehhtuwo, tam tlehhmi'iiwós kudá' waa/oo/amo kaa haratlinti'iiká.

³³ Gawaá adoorihe deelor'ín gana quqmaareés, adór hinsluú wa ale, slafingw'ín guna hartsaát ar gaansloó dae tlaáq.

³⁴ Bál bar baraakarka ngaa tsuú/, awa hatlá' nay hhu'uu'uná', Mungú nguri leelehhiitiyé' ar tsáp.

³⁵ Kari insláy adór Mungú tar tlaa/ar'ín, Munguúduú Gáwtí dirií' an ba/amusmooín.

³⁶ Ala nguna al/aginé' ar afer'ín, kway lamtá babáy afer'ine.

³⁷ Asma inooín naa bartá Mungú i gawduy'iiká, inooín ki inkihhiimeeká baraá alqadoorose.

³⁸ Tam adoorihe inós tawa kuduú gurtleemuú koóm, tlakweemaaín gina gurtláy nee inooín gaa hhaamisiiká. Ki/imaá yaariire mune gana gu/ún buhhtaawós gina ila/án.

³⁹ Inós gina insláy inooín tawa múk waaraáhh gawaá daanduú yaamuwo, tawa adór fur'ár waaraahh iri ki/iká.

⁴⁰ Nguwa si'iyé' baraá xaanxáy wa ale, ngway gurhaamírár ayé' baraá darmuú wa ale a sagaá wa magá'?

⁴¹ Tana alií kií/, Mungú kway iiaraa'ár, kudá' Hhoohhoó' oo Israeli nguri buhhtisiyé'.

⁴² Inooín /uuruuwós ngwa inslay'iiká, baalaadá' ngiwa tuú/ dír wakusmoowo ngaa inslay'iiká.

⁴³ Adór layuuwós ngira tleéhh baraá Misriro, waa/oo/amoorós baraá qamaá Soani.

⁴⁴ Ma'aá yau baraá ayaadae gina tseere tleéhh, as múk Misri ma'aydá' mingiwa wahán.

⁴⁵ Gina ba'aruú yaariír oo dítstí tleés, muu guri kaakiíhh, nee aamaxupa ar hhita ngaa hup.

⁴⁶ Balangw'ín guna karkártií tleés, nee ingigi balangw'ín guri /ák.

⁴⁷ Sabiíbuuín guna hhaamiís ar tluwoó tlaa/e, nee xaa'aá /aantsír'ín gina hhitín ar tluwoó tsatsa'aarén.

⁴⁸ Hikwaaín gina tsuú/ ar tluwoó tlaa/e, nee muruú ququmát doori nguna slahhiyé'.

⁴⁹ Mungú ina tseere tleehhiít buhhtaawo amor'ín alé, iri qa/iít ar xaraasleema, inooín giri slahh'eés, boohhár malaykér tsu/uut gari ya/aáw.

⁵⁰ Buhhtaawós niri kumiitiyé', tam gwa'ara gaa pa/asiiká dir'ine, giri daásl ar pu/i.

⁵¹ Umuúqo na/oó baris oo múk Misri guna gaás, baraá xafoó múk Hamuwo umuúqo barismo guna gaás.

⁵² Aluudae mukós guna geeraharaahaár adór bee/aangw. Guna de'én adór daqtá baraá darma.

⁵³ Gina geerahaár ar saxareema, tam naa da'ayuumiti'iiká, ala wakuuser'ín tlawi gari gú/.

⁵⁴ Gina huúw ay baraá yaamuuwós kudá' hhoohhoo', yaamuudá' tlom'aá koomá' awa naa hayóh ar /uuruuwós.

⁵⁵ Xoordu giri guús geeraaín wa ale, yaamuuín giri qasmiís, digeemi giri qoomeemeés, nee tlahh'aá Israeli gina iwiitiís baraá xafay'ín.

⁵⁶ Ala tam adoorihe Munguú Gáwtí dirií' nguna iiaraa'ariyé', ngway si'iyé', tam kaahirós ngaa iialooeesi'iiká.

⁵⁷ Ala inooín nina alií ki/iyé', tari al/aymuuse adór taati'ii'ín wa ale, tari warqáy adór ga/alér waatlaarmoowós aa sololo'oot.

⁵⁸ Nguna buhhtamiisiyé' ar wa/ameedá' taa tleéhh as sluufoó slaqsa'aá mungui. Ngway dá/tár ayé' ar murslaaqatuú munguiidá' naa tleehhiyé'.

⁵⁹ Mungú adoodá' ngiwa axaás, giri iigahhaát, múk Israeli gway sií' ló'wa ale.

⁶⁰ Hotaarirós ar baraá Shilo gari máy, tooaáng xaftós iwa baraá tla/ángw muu.

⁶¹ /Uuruuwós guna máy lawaali'iimárií ale, sandakmoó alqadoorós guna ya/án kuwa hayoohi, xirfuuwós guna haniís baraá dabaá wakuuse.

⁶² Mukós guna ii qa/iimiít, guri haniís kuwa muxi ar paangadu.

⁶³ Masoombar'ín asla gari /ák, nee múk dasuuín gu duxuút iri qwaár.

⁶⁴ Kaahamuuser'ín ar saaliingw kari tsuú/ ar paánga, tam kwaeelii'ín pa/ángw ir tsuunqumiisiya' ngwa slay'iiká.

⁶⁵ Aluuwo AAKOÓ MUNGÚ nay daarkiít adór heé aa guu', adór migusmoó tsimahhuús oo ma'aá sabiíbu ngaa wah.

⁶⁶ Wakuuseerós gari muúx, nari guwiyé' alií alé, gari mureekeés ay alhhe'eesay wasle.

⁶⁷ Tlahhoó Yosefu guri sií', tam tlahhoó Efraimu gwa tsawaariiká.

⁶⁸ Ala tlahhoó Yuda guna tsawaár, tloomár Siyoni tidá' i ló'wa slai.

⁶⁹ Do'ós oo hhoohhoó' guri tleéhh, oo tleerantleér ay gawaá doori, guri gawdeés adoodá' yaamu ngira gawdeés ay alhhe'eesay wasle.

⁷⁰ Daudi guna tsawaár, sagadiyusmoowós, gway leéhh baraá qawtantá bee/aangw.

⁷¹ Guna hingeés baraá de'éngw bee/aangw nee deeloó bee/ángw wa ale, as mukós Yakobo nguwa de'en, kuduú Israeli oo aalirós.

⁷² Nee Daudi giri de'én ar inkihhimu, gay iwiitiís, nee gay geeraharahaár ar xu'uti.