WARA'AMI 72 - Biblía Axweesantá Hhohho' ar Mungú 2004

Firo as waawutmo

(Wara'amtá Solomon)

¹ Mungú, waawutmo intsaahhatiseek sakwasleemár ganaa'a, nee waawutmo gan'amuuwók tii hanis.

² Mukók ngu har'oohi ar sakwasleemár ganaa', nee narkuteerók ngi geeraahari ar gan'amu.

³ Tlom'i diihhooa ngi huwiye', nee mamaá hho' ngi laqwaaliye'.

⁴ Waawutmo kudá' liitlakwen ngi aleekalaa/i, múk gaa wásl ngu tu/i, nee heé múk baraamaanuús ngu nakaa/aruy yaamií alé.

⁵ Waawutmo i hotaatin ay nángw naangw, adór tsee/amá nee slahhaangw ir gwa/aatiya'.

⁶ Inós ni aweeri adór tluwaay gawaá tsaaroó taa tsaát, adoodá' baafáy ir baafi gawaá yaamií ale.

⁷ Baraá hotaawose gan'amu ngu eeharahari deelo sleémeero, amohhooa nee wayda ngir hooti kureerisleém.

⁸ Inós aleesleemu ngu kon bihhér yaamu sleémeero, iimír yaaeedá' ur ar ta babay Eufrate ay alhhe'eesoó yaamu.

⁹ Kudá' baraá xaanxáy wa hootá', i geeraawós i tumbarara'atiye' nee wakuuseerós afe ngi yaamúr dits.

¹⁰ Waawituú Tarshishi nee múk yaamaá kaahaar oo baraá tla/ángw tláwtií dirií', koódi ngi huwiye', waawituú baraá Sheba nee Seba qeemuú i kona' ngu haniisiye'.

¹¹ Kár ee, waawitá sleémeero ngu ilaiwaa/iye', nee xoordu sleémeero ngu sagadiyuusiye'.

¹² Asma inós heé gaa wásl oo gu i /aa/amiím gu tuu/, nee heé narkutmo oo alee/isoó koomaaká gu tuu/ sleeme.

¹³ Inós i gurtleemuú kón dír liitlakuuse nee narkuteero. Inós múk gaa wásl gu ba/amis.

¹⁴ Slafingw'ín gu tuu/ dír malguuseero, dír ilaawose slafingw'ín a gár slahhaa'.

¹⁵ Waawutmo i hooti, nee sahaábuú Sheba ku haniisi dirós, ku aleefiriirin nee muu umuúqo qoomaaro, nee ku tsuuqaá Mungú i slai deelo sleémeero.

¹⁶ Balángw yaariír i hamaari baraá yaamuwo, ay gawaá tlom'i, bu'uungw /ar'i ngi lalay, mamuuwós ta adór kuqaá yaamaá Lebanoni, nee múk baraá gixsa i tlahhi adoodár gitso ir slu/ubibiin baraá yaamuwo.

¹⁷ Yaeemír waawutmo i kumaamit, waawutmo ku diidi'iimaamisi qooma sleémeero ar tsee/amá iwa gwa/aati, xoordu sleémeero tsuuqa ngi slaye' ar inós, nee inós ku bay, «Kudá' taa tsuúq.»

¹⁸ Nee i xirfuuti AAKOÓ MUNGÚ, Munguú Israeli, kuduú muruú waa/oo/amo gu tlehhiít inós kilós.

¹⁹ Umuuwós kudá' xiríf ku diidi'iimiis ay alhhe'eesáy wasle. Yaamu sleémeero xirfuuwose i hatsiye' ay alhhe'eesay wasle! Amin! Amin!

²⁰ Ay diirí an alhhe'eesoó firór Daudi, garmoó Yese.