WARA'AMI 7 - Biblía Axweesantá Hhohho' ar Mungú 2004

Firór heé taa hara/untsín

(Tsuunqumisuú Daudi aa daá' dír Mungú asma Kushi, heé tlahhoó Benyamini)

¹ AAKOÓ Munguúeé', aníng nina amoorógí goów. Ba/amisáng dír kudá' sleémeero aníng i gusisima'a, aníng alee/iisáng.

² Mindiwa hardihiyé' adór dirángw wa ale, aníng iri feehhamisiyá', mitiwa uuruúx amór saáw i alé, dír heé i ba/amís iwa kahhi.

³ AÁKO, Munguúeé', barnaxes muruuwí ugwa tleéhh, barnaxes dabaaeé' iga slasla/areés ar tlakweema,

⁴ barnaxes mulqumooeé' ugwa gár tlaákw i tleéhh, laqaá bar wakusmooeé' bura tawó áw,

⁵ daqaní wakusmo aníng i eehari nee i oohi, i yaamií kalaa/i i teeruy.

⁶ AAKOÓ MUNGÚ, kuúng sihhiitáng ar buhhtaawók, /aátl, wakuuser'eé' arba/eek, Munguúeé', kuúng sihhiít! Kuúng daqisleém a slá' gan'amu kuwa tlehhiiti.

⁷ Xoordu i burumburitiye' kuúng u harweeriye', kuúng ki sa waawuti'iín gáwtá wa ale.

⁸ AAKOÓ MUNGÚ, kuúng xoordu in sakwasleemút. Aníng sakwasleemuutáng ar gan'amuueé' nee adoodá' aníng wa hariim.

⁹ Tlakweemaá múk tlákw mindiwa kumiitiyé', heé hotaawós ganaa'á' gawdeeseek baraá gan'amu. Kuúng, Aakoó Mungú, kudá' gan'amuú koóm, kuúng an kudá' naaqór baraá mune nee inslawoó muu gu tsee/ariím.

¹⁰ Mungú an baqmór'eé' adór gaamboót, inós múk ganaá' baraá muner'ine gu ba/amaamis.

¹¹ Mungú a ga/aawusmoó ganaá', tlakuuse qooma sleémeero gan sakwasleemuut.

¹² Hee barnaxes aa hhu'u'uniiká, Mungú paánga ga duuq, ga/aleerós ga mahángw i qaas, ga amohhe'ees tsaxaararo.

¹³ Inós xooslár slaqwara gaa amohhe'eés, nee maheerá qarko.

¹⁴ Qaytsiít, heé tlaákw aa tsíh tlakweemaawo, gár aa hats baraawose a muruú tlákw gun aldakuut, nee tsiihaywós kwihe gár i laqwaali a lameemo.

¹⁵ Bohoongw gun baráy i foola hhe'ees, ala inósuú kilá' in baraadí /eet.

¹⁶ Tlakweemawós ngun saki/iyá'. Hara/untsawós ngun saki/iyá'.

¹⁷ Aníng AAKOÓ MUNGÚ un sluufmiís as gan'amuuwós. AAKOÓ MUNGÚ Aleesleemusmo un xirfayeemiís ar daa'aangw.