WARA'AMI 66 - Biblía Axweesantá Hhohho' ar Mungú 2004

Daa'ángw xirif nee sluufaay

(Daa'aangw. Wara'ami)

¹ Yaamu sleémeero Mungú diidi'iimisaak ar bara/.

² Xirfuuwós daa'aak, inós xirfayeemisaak!

³ Mungú bawaak, «Tlehhmi'iiwók iwa dae tlaaqiya' a adór milá? Asma /uuruuwók ku úr, wakuuseerók ni hardát, tiri dír geeraawógií niinaweemís.

⁴ Muu sleémeero u sluufmiis uri ii daa', eeít, umuuwók kuri xirfayeemiis ar daa'aangw.»

⁵ Qwalaasé', xuxuuaak tlehhma'aá Mungú aa tleéhh, tlehhma'aá Mungú aa tleéhh tla/ángw muko i dae tlaaqiyá'.

⁶ Tlawi gana warqeés tari yaamaá kaahaar, baraá yaaeero muu iri waaraáhh ar ya'a'. Amoodá' an amór nguwa saqwalaala/iyé'.

⁷ In waawuti'ín ar aleesleemuuwós ay alhhe'eesaay wasle, inósuudá' xoordaá amohhe'eemiís, dee/aanuuse mitiwa kilooín xirfayeemís.

⁸ Kuungaá xoordu, Munguúrén diidi'iimisaak, afór xirfuuwós ilahanmisaak ka axaasi.

⁹ Asma inós slafingwrén gun taami kón, nee tam ya'aarén gi mayká niwa nikiitsiya'.

¹⁰ Aá Mungú, atén kuúng taa iiát, adoodá' muqslír /awaak kar kwahhaahhuuti, qoomár bar ka peésa tlehhiit.

¹¹ Tina dahás baraá baratsufaay, nee huuwár iiloo' kari qás baraá afeetleerén i alé.

¹² Kuúng wakuuseerén ana pa/ángwií hanís tiwa yaamaá harakala/i, ana slahhaa'aán adór múk aa waaraahh ar baraá asla nee tsaxwaá yau. Ala hám daxta tina dúx tiri húp baraá saxareema.

¹³ Aníng a dáh baraá do'ók nee ilahhooár da/a, al'axweesante'eé' ngari boo/eés diroge.

¹⁴ Tidár sluufay'eé' afkwe'eene naa káh, qoomár niwa baraá slahh'amií dirii'.

¹⁵ Aníng ilahhooár da/a ar wahhaar ngi haniís, nee ilahhooár gwaandaawér ta tsu/i, dinkwa nee hikwa nee aaraawo ngi haniís.

¹⁶ Qwalaasé', axaasé', kuungaásingá' Munguú ilaiwawa/á', aníng ngi alki/iít tidá' naa aníng i tleéhh.

¹⁷ Una ateét ar afkwe'eé', tsifrangw'eene inós una durbiibiím.

¹⁸ Geera bar muruú tlákw un inslaasláw baraá muunaáeene, AAKOÓ MUNGÚ geera iga axaasiiká.

¹⁹ Mungú aa kángw kilá' wa axaás, afór firor'eé' gaa iiárií qaás.

²⁰ Nee i xirfuuti Munguúdá' firor'eé' gaa si'iiká, tam sla'aarirós ar warqawaaká gaa hingeesiiká dir'eene.