WARA'AMI 64 - Biblía Axweesantá Hhohho' ar Mungú 2004

Firo as baqmoó

(Wara'amtá Daudi)

¹ Mungú, afor'eé' iiárií qaaseek, baraá wa/aa/ir'eene, slafingw'eé' xuumeek dír wakuuser'eé' tidá' i dae tlaaqa'a.

² Aníng baqáng dír múk tlakwe kudá' iga geewaqaat ar naaqo, nee dír boohhár muu ar muruú tlákw tlehhiita.

³ Kudá' afer'ín ngaa duuqiye' adór tsati'ií wa ale, /ayma'aá afa tli/a ngin tlaquutiyá' adór maheeri.

⁴ Heé hhoó' ngun gáwtí tlaquutiyá', ngun tlaquutiyá' ar gaanslaay, i hhaslitiaaká.

⁵ Tana naagiís baraá inslawoó tlakwe, tari kaahi slayé' adór tsaaxweelay'ín kur lu/i, kawa xui, Heé gi ár i kaahh.

⁶ Lohuuín nga amohhe'eesiyé' awa muruú tlákw kur tleehhi, ta kaahi, «Kangwrén ugwa qoomeesaán.» Naaqór baraá guruú hee, heé ga xuú' a heemá?

⁷ Ala Mungú gin tlaquut ar maheeri, nee giri hari'áy ar gaanslaay.

⁸ Inooín ki hhaamiis as axweesanoó afer'ín ar kilá', heé giqo ara saga gun muumukuumiis.

⁹ Nee muu sleémeero tari da'ayuut, gadiyér Mungú kari alki/iit, nee tlehhmi'iiwós kiri aldakuut.

¹⁰ Heé hotaari hhó' AAKOÓ MUNGÚ ngu saqwalaala/i, nee ngu i gowi! Múk mune ganaá' tiri xirfayeemisiyá'.