WARA'AMI 63 - Biblía Axweesantá Hhohho' ar Mungú 2004

Mungú ugwa insláw

(Wara'amtá Daudi. Qoomár iwa baraá xaanxoó Yuda)

¹ AAKOÓ MUNGÚ, kuúng an Munguúeé', án kuúng u leelehhiít, án kuúng ugwa wa slahhaá' adór heé aa waxiit. Aníng kuúng ugwa wa slahhaá', adór yaamaá xaanxaay awa naa hhaahheeruutiyé'.

² Án kuúng u ár dír do'ók kudá' hhoohhoó' wa ale, as /uuruuwók nguwa ar nee xirfuuwoge.

³ Asma sla'aarirók ar warqawaaká a gár hhoo' ta slafiingo, afkwe'eene kuúng u xirfayemiís.

⁴ Án kuúng un diidi'iimiís baraá slafingw'eé' sleémeero, dabaaeé' i gáwtí tleés as kuúng uwa firiim.

⁵ Aníng a qwalalaá/ adór heé wahhna nee waeemo gaa /aay, afkwe'eene kuúng u xirfayeemiís ar qwala/.

⁶ Bura insláw baraá qatanir'eé' wa ale, kuúng un aldakuút xweera sleémeero.

⁷ Asma kuúng a alee/isay'eé', nee aníng an baraá/ as iwa bihhaawógií ót.

⁸ Aníng kuúng un i naga'aát, aníng in ót ar dakók kudá' /uuruú koóm.

⁹ Ala kudá' slafingw'eé' leelehhiitá' as nguwa hhitina', ni daraahiye' ay baraá gi'i.

¹⁰ Kin tsuu/ ar paánga, tari muruú /aymár intsaawe.

¹¹ Ala waawutmo Mungú gun sa qwalalaa/, kudá' sleémeero al'axweesani nga qaasiye, ar umuuwós ta qwalalaa/, ala afér lamuuse kan xasltis.