WARA'AMI 62 - Biblía Axweesantá Hhohho' ar Mungú 2004

Mungú an xuumusmooeé'

(Wara'amtá Daudi)

¹ Aníng Mungú un daamaraám ar qitla, ba/amar'eé' amór i dahh a amoorós.

² Inós kilós an tlaa/ar'eé' nee ba/amar'eé', a koo/ír gawit ar iga harwet, ti baloó dingisiiká.

³ Ay xaylá hee ku /amaatsegaagita', kuungá' sleémeero kuwa dinkwaárií muxa', inós barqo adór baquú huuhu'uúm, laqaá koo/ír dingiim.

⁴ Baraá axweesanto tin kaahi slayá', as kuwa dahhi dirós tidá' ilaiwa/ameero, inooín lama ngi saqwalaala/iyá', afer'ine /ayma'aá tsuuqaá koomá' kin kah, ala baraá muner'ine tan lu'umis.

⁵ Aníng Mungú un daamaraám ar qitla, harahhifor'eé' amór i dahh a amoorós.

⁶ Inós kilós an tlaa/ar'eé' nee ba/amar'eé', a koo/ír gawit ar iga harwet, ti baloó dingisiiká.

⁷ Ba/ama nee xirfueé' amór i dahhiya' a amór Munguúeé'. Mungú an adór tlaa/ár aníng i baaq, nee un ii goów.

⁸ Kuungaá muu, Mungú haratlintiaak daqisleém, slahh'amuuhúng alki/iitaak dirós i alé, Mungú a dír guwayrén.

⁹ Muu a adór hiinsluú tawo, tam múk ta ilaiwawa/i a tawo sleeme. Iilooeemaaín bira alqoomés i hakwaaiyá', sleémeero dinkwaaro ki islahh ta hiinsluwo.

¹⁰ Harahhifoorók ma qaasaar baraá muruú hara/uuntsa, laqaá ma daara/aamaar ar daqaari'iimár fiiso, daqaari'iima bira tláhh, muunaáwók munguwa hayót.

¹¹ Wa'aá wake Mungú ina axweés, ki/imaá tsare tí ana axamiís, adór /uuru tar oo Mungú.

¹² Nee sla'aaridá' warqawaaká i dirók, AAKOÓ MUNGÚ. Asma kuúng umuú heewo un bú' ar adoodá' tlehhmi'iiwós i dirii'iya'.