WARA'AMI 60 - Biblía Axweesantá Hhohho' ar Mungú 2004

Firo as ba/amisa

(Daa'ángw intsaahhasa, oo Daudi aa daá', qoomár Daudi iwa slaqwi nee múk Aramu oo yaamaá Naharaimu, nee múk Aramu oo yaamaá Soba, qoomár Yoabu niwa kií/, múk Edomu oo kume mibeeri tsár guna tsuú/ baraá xatstá Diwtá wa ale)

¹ Aá Mungú, taa kwáhh, baqmoorén aga giqeér, kuúng aga búhh. Na'ás, ti malé adoodár aáng i ki/is.

² Yaamu ina diingís, niri feehhitiyé'. Didá' aa feehhit amohhe'eeseek, asma i diingiín.

³ Ala mukók ugwa al'iiloouúr, as buhhtaawók atén tari adór múk taa difaáír waahaás, atén tari oonimiitaán.

⁴ Laya aga qás as kudá' kuúng u ilaiwawa/á', as tawa amoodí gowi tsaxwá maheeraá wakuuseero.

⁵ Atén ti mu/aywats nee ti baalírí sleer ar /uuruuwók, as kahhó' mukdá' kuúng ta sla' kuwa ba/amis.

⁶ Mungú ina axweés dirós tidá' hhoohhoó' wa ale, iri oó', «Shekemu a qasiís ar qwala/, xatstá Sukoti ngari qoomeés qasiisaro.

⁷ Gileadi a te'eé', Manase a kwe'eé', Efraimu a baqmór sagw'eé', Yuda a hharte'eé' ar waawuti'iima.

⁸ Moabu a qwaree/amooeé' oo hamtlo, nee Edomu ugwa hharte'eé' qaás as tawa kwe'eé'. Aníng a baraá/ asma múk Filisti ugwa baál.»

⁹ A heemá heé aníng i huúw dír gixsár koo/irós taa gawdeés? A heemá heé aníng i geeraahaár tay Edomu?

¹⁰ Mungú, kuúng atén taa tsuwa kwáhhi? Kuúng nee slaqwaruuseerén ti alkoondá'aáke?

¹¹ Atén ti alee/is dír wakusmoowo. Asma alee/isoó hee i gaa buiiká.

¹² Mungú bir bartarén i dirii', atén a baalimaán, asma Mungú wakuuseerén ga yaamaá harakalaa/.