WARA'AMI 6 - Biblía Axweesantá Hhohho' ar Mungú 2004

Firór qoomár slahh'amaaye

(Wara'amtá Daudi)

¹ AAKOÓ MUNGÚ, án mi iigahhaataar ar buhhtaawók, ar buhhtaawoge án mi muxaar.

² AAKOÓ MUNGÚ, án gurhhooárí tleehháng, asma án a liitlakusmo. AAKO MUNGÚ, án hungu/uusáng, aníng aga slahhaá'.

³ Muunaáeé' aa ló'wa amoqwaár. Xáy AAKOÓ MUNGÚ, kuúng ay xaylá ta tligaagiin aníng alee/isaro?

⁴ AAKOÓ MUNGÚ, ki/áng, aníng ba/amisáng, án ba/amisáng as hhooeemawók.

⁵ Baraá múk aa qatli heé kuú inslasláw i kaahh. Baraá gi'iwo heé kuúng u xirfayeemiís a heemá?

⁶ Gurhaamir'eé' iga slaaqatís. Daqisleém xweeraawo hhirhheerieé' nin ku'umamitiyá' gawaá qatanir'eé' ale. Hhaftuueé' iri naá/ as hhirhheeraá /aa/ee'eé'.

⁷ Ilaaeé' niri daslasla'aamitiyé' as gurhaami, nay wanana'atiyé' as wakuuser'eé'.

⁸ Quutlé' dir'eene kuungá' sleémeero, awa tlakweemaá tlehhiitá', asma AAKOÓ MUNGÚ afór /aa/ee'eé' gaa axaás.

⁹ AAKOÓ MUNGÚ firor'eé' gaa axaás, inós firor'eé' gaa ya/án.

¹⁰ Wakuuser'eé' sleémeero i murút, nee iri amoqwát, i alií ki/iyá' ar gaanslaay tay muruut.