WARA'AMI 59 - Biblía Axweesantá Hhohho' ar Mungú 2004

Firór baqmoó as wakuuse

(Daa'ángw Daudi aa daá' qoomár Saulo muu nguwa ya/aáw Daudi kuwa gaasi)

¹ Munguúeé', aníng tu/áng dír wakuuser'eene, baqáng dír kudá' naa amor'eéní haratlay'i.

² Tu/áng dír kudaá tlakuuseero. Ba/amisáng dír múk kundi'i ra/atene.

³ Qayteek kudá' slafingw'eé' ngu haratseegamisá', awa xaraslá' iga hara burumburitiyé', ala AAKOÓ MUNGÚ, slám án gár naa dakuús iqo káhh.

⁴ Aníng gár naa dakuús iqo káhh, in tawo ti'i'iná', tina amohhe'emisiyé' niwa amor'eé' haratlaya'. Kuúng /akuutáng, án alee/iisáng.

⁵ AAKOÓ MUNGÚ, Munguú Aleesleemusmo, Munguú Israeli, tlawáng, xoordu sleémeero slahheek, kudá' tlakweemaá tlehhiitá' mi gurtlawaar.

⁶ Qoomár tsiindoowo nin ki/iyá' in hhuweeliná' adór seeaawér wa ale, nee niwa baraá gixsár wa tambeeruusiya'.

⁷ Ga/aaweek, ar afer'in tan tawo tlororoo', afer'ín i qarqát, a adór hhamaandí, inooín kawa xui heé gi axamiís i kaahh.

⁸ Ala AAKOÓ MUNGÚ, kuúng in wa qaseén, xoordu sleémeero in waaqá'.

⁹ Kuúng an /uuruueé', aníng xirfuuwók u daá', asma kuúng Mungú, an baqmor'eé'.

¹⁰ Mungú kuduú sla'aarirós warqawaaká ni hardah. Mungú aníng i aleesleemuú i haniis wakuuser'eé' ngiwa arbaa/.

¹¹ Wakuuser'eé' ma tsu/aar, aluuwo muk'eé' miwa gunqaruút. Diyaa/eek ar aleesleemuuwók nee kiwa slahhe'es, aá Mungú, kuúng an baqmoórén.

¹² Inooín masók ki ohín baraá daara/angw'ine. Asma afer'ine muruú tlákw ngun axweemamisiyá', slamí i lu'umisiyá' nee i lameemaá tlaaqiyá'.

¹³ Hhaamiiseek ar buhhtaawók i qororo'ootiye', as kahhó' muu ngi xui adór Mungú tar waawutmo baraá xwaylár Yakobowo, tam ay alhhe'eesoó yaamu sleémeero.

¹⁴ Qoomár tsiindoowo nin ki/iyá' in hhuweeliná' adór seeaawér wa ale, nee niwa baraá gixsár wa tambeeruusiya'.

¹⁵ Nin tambeerusiyá' iwa muruú /aymár leelehhiitiya'. Birna aaxi'iiká i /orootliyá' xweera sleémeero.

¹⁶ Ala aníng /uuruuwók u daa'ángw wa óh matlaatleero. Sla'aarirók ar warqawaaká an daa'ángw wa óh ar qwala/. Asma kuúng an baqmor'eé', nee dír ni goow baalaadár slahh'amko.

¹⁷ Kuúng an /uuruueé', án xirfuuwók u daá'. Asma kuúng Mungú, an baqmor'eé', Munguúeé' kuduú sla'aaridá' warqawaaká nga dir'eéni laqan.