WARA'AMI 58 - Biblía Axweesantá Hhohho' ar Mungú 2004

Mungú a sakwasleemusmoó úr

(Daa'ángw Daudi)

¹ Ar loe, kuungaá waawitá, gan'amu u koondá'a? Kuungá' muu, kwasleemár muu a tlaqá'a ar gan'amu?

² Aasla'áy, baraá munerhunge tlakweema i tlehhahhitá'. Kuungaá malguuse baraá yaamuwo a múk daba tlákw.

³ Kudá' gan'amuú kooma'aaká naa qaroó paraanga/iyé' iimír baraá guruuwo. Tam iimír kiwa laqwaali a lamuuse.

⁴ Qarkuuín a adór kuquú dayshamo, slaqsay'ín a adór makimbi/itá iia wasl,

⁵ kudá' afór qwaslaare ga axamisaaká, tam qwaslaari'iima ka tlehhiiti ar adór ganaa'.

⁶ Mungú, sihhinaá wakuuseerí kwakwaahheek, AAKOÓ MUNGÚ, taqesamaá direeriká' giqaweek.

⁷ I yaamií /one' adór ma'aá baraá hhasaangw, maheeriiwós masók i afér kon'aaká.

⁸ I weeqiye' adór gwa'aarár kitsinqaay, adór tsiihoó taa guruú wa kwaáhh oo looa ga araaká.

⁹ Qoomár ngiwa tsahhi'iiká ki hingeesi, adór xwaansloó laqayá' wa ale.

¹⁰ Heé hota ganaá' i qwalalaa/ bar ngaa ár wakuuse kaa li/áy buú'. Ya'aawós gin hamaatl ar tseerér múk hota ganaa'aaká.

¹¹ Muu iri ooi, «Ar looeemaawo bu'tuú heé ganaá' i deer. Ar looeemaawo Mungú i deer oo sakwasleemuút baraá yaamuwo.»