WARA'AMI 57 - Biblía Axweesantá Hhohho' ar Mungú 2004

Firo as alee/isaay

(Daa'ángw Daudi aa daá' qoomár iwa goów Saulo wa ale, iri nahhaát baraá mar'i)

¹ Án gurtlawáng, Mungú, aníng gurtlawáng! Asma aníng kuúng ugwa i goów, naa goów baraá mahhatuú hhampe'eeriwók, ay dír tlaftá tlaakw i waarahh.

² Munguúdá' Gáwtí dirií' un i /aá/, Munguúdá' sla'aarirós ga boo/eemaamiís dir'eene,

³ alee/isaywós ngu gawaá doorií wá huuw iri ba/amis, kudá' aníng i hhitár wa slaá' nguwa mureekeesi. Mungú sla'aarirós ar warqawaaká nee inkihhimuuwose ngi laqán!

⁴ Aníng taa harweér nee wakuusér adór direeri, kudá' múk /aa/ayá'. Sihhinaín a adór lawlu nee maheeri, tsifreeri'ín a adór tsatoó xaraásl.

⁵ Mungú, kuúng xirfuút gawaá dooriwo, nee daanduú yaamu sleémeero xirfuuwók i geehhoouy.

⁶ Tsaaxweeli kana qaás as tiwa ya'a' oohi. án nay ló'wa gurhaamuút, bohoongw ngwa dír geeraaeé' fooliyé', ala inooíná kilá' nay baraadí /eetiyé'.

⁷ Aá Mungú, muunaáeé' i kwislmiitiiká, eeít, muunaáeé' i kwislmiitiiká. An daá' nee un xirfayeemiís.

⁸ Garmoó heewí, tlawáng, seése nee gidaandoóri, tlawaaré'! A daa'aán as da/aáw iwa daa/atuur.

⁹ Aáko, án kuúng u sluufiís tla/ángw múk wa ale, uri xirfayeemiís ar daa'aangw tla/ángw xoorduú wa ale.

¹⁰ Asma sla'aarirók ar warqawaaká yaamu gaa hatsís ay gawaá doori, nee inkihhimuuwók tay gawaá huunkáy.

¹¹ Mungú, kuúng xirfuút gawaá dooriwo, nee daanduú yaamu sleémeero xirfuuwók i geehhouy.