WARA'AMI 56 - Biblía Axweesantá Hhohho' ar Mungú 2004

Firór heé Munguú haratlintaatií'

(Wara'amtá Daudi aa daá' qoomár kuwa óh nee múk Filisti baraá yaamaá Gati)

¹ Aá Mungú, án gurtlawáng, asma múk án slahh'eemiís i deer. Wakuuse in baramaanús tlaatla/aangw sleémeero, nee in slaqwarár i huwaahúp.

² Wakuuser'eé' tlaatla/aangw sleémeero án tin slahh'eemiis. Asma awa slaqwarár huwaahuwá' ar daara/aangw ki yaariir.

³ Qoomár bara da'ayuút, án kuúng un harahhiíf.

⁴ Ar alee/isoó Munguhe axweesantós an xirfayeés. Mungú ugwa harahhiíf, a da'ayuutaaká, hee gár i /iisi a milá?

⁵ Wakuuser'eé' qooma sleémeero aníng in slahh'eemisiyá', qooma sleémeero gár ta aldakuuti a adór án tir slahh'eemisi.

⁶ Tin burumburiná' as án iwa gigdina', umuú gár ni tlehhiita kan digir deliit. Asma slafingw'eé' kun gigdín.

⁷ Gawaá adoorihe naanaqeek as tlakweemaaín, Mungú, buúhh, mukwí hhaamiiseek.

⁸ Amoqwaqwadingw'eé' sleémeero kuúng u xú', hhirhheerieé' kuúng i insleér, xáy, kaa gooínke baraá kitaábuuwoge?

⁹ Daqaní wakuuser'eé' i alií kí/, bál án kuúng bura ateét. Tí a xuú', adór AAKOÓ MUNGÚ i bartaeé' i dirii'i,

¹⁰ Ar alee/isoó Munguhe axweesantós an xirfayeés. Ar alee/isoó AAKOÓ MUNGÚ axweesantós an xirfayeés.

¹¹ Mungú ugwa harahhiíf, a da'ayuutaaká, hee gár i /iisi a milá?

¹² Mungú, al'axweesante'eé' gár kawa hariím aqo ngin boo/eés. Ilahhooár sluufaay ngi haniís.

¹³ Asma aníng iga ba/amís baraá gwa'araaro. Eeít, ya'aaeé' ina báq mawa huú', as niwa hoot ar gwa/aateema baraá slafingo, dír geeraá Mungú wa aleeró.