WARA'AMI 55 - Biblía Axweesantá Hhohho' ar Mungú 2004

Firór heé taa al/aáy nee mulqumo

(Wara'amtá Daudi ar intsaahhasa)

¹ Mungú, na'ás, firor'eé' iiárií qaaseek. Ma nahhataar bur gurtleemuú i fiririím.

² Iiárií qaasáng nee mu/aywatsáng. Aga slahhaá' wa/aa/iro, adór ni laaq a xuaaká.

³ Asma afór wakusmo ar dae tlaaq aga axaás, nee múk tlákw baramaaniro iga slahh'eés. Asma aníng in baraá slahh'amkwí dahamisiyá' ar tlakweemaaín, nee in i qa/iimitiyá' buhhtaawo iri aahhiyá'.

⁴ Muunaáeé' i slahhahhaa', daér gwa'ara iga eér.

⁵ Dae iga daaraxár eér, nee hor/i iga gás.

⁶ Nari oó', «Hhampe'eeraá adór kuqaá hhooki geera bir koóm, geera a /akuút amorqá' saaw nay hungu/uús.

⁷ Geera a amorqá' saáw i tláw, nay hotaá áw baraá darma.

⁸ Geeraawo a gaanslár ta'aaiím, bambaao nee tlawtá aa lexwaandut ngiwa ilagoow.»

⁹ Aáko, tlakuuse amoqwaareeseek, tsifrir'ín hhitimeek, asma gár naa ár a tlaahhír ur nee gila baraá gixsaro.

¹⁰ Tlaatla/aangw nee xweeraawo, koo/ír gixsa ngin harweditiyá', nee baraá gixsaro gár aa hats a tlehhmatlakwe nee slahh'amu.

¹¹ Hhita aa tláhh baraá gixsaro. Baramaani nee hara/uuntsa i farkina'aaká baraadae.

¹² Asma heé iga /ooslin a wakusmooeeneeká, geera bar inós aga qiítl, oo iga waqaa' a kudá' aníng iga aahhiiká, geera bar inós aga nahhaát as miwa ár.

¹³ Laatí an kuúnguduú qartaeé', hee'eé', mulqumoeé' kudá' slahhaá'.

¹⁴ Ana axweemamisaán ar mulqi'iima, ana aldinku'uumamisaán sleémeero ar sla'aari, baraá doó Mungú wa aleeró.

¹⁵ Kuká' i gaanslár qatliye', i slafi /eetiye' ay baraá gi'i, asma tlakweema naa hatsiyé' baraá maray'ine nee baraá muner'ine.

¹⁶ Ala aníng Mungú u ateét, nee AAKOÓ MUNGÚ aníng i ba/amis.

¹⁷ Tsiindo, matlaatle nee qoomár tlaatla/aango, an wa/a/uús ar gurhaami, inós afor'eé' ga axaas.

¹⁸ In ba/amis iri amohhe'ees, baraá slaqwaraadá' naa iimu/uumi, asma awa nee aníng slaqwá' ki yaariir.

¹⁹ Mungú iimír aange aa iwiít gawaá kitaangós oo waawuti'iima. Inós aníng i iiárií qaas, ala inooín giri hhartsúy, asma dabeerós ngaa mayé', nee ngu ilaiwawa/iaaká.

²⁰ Mulqumooeé' kudá' slahhaá' mulqeerós gaa sakií/. Alqadoorós gaa sií'.

²¹ /Aymi'iiwós i tsuiyá' di/tá /awak ba/a. Ala muunaáwose gaa a slaqwara. /Aymi'iiwós i natsaatsaiyá' adór di/i, ala i tlaaqaná' adór siíme.

²² Slahh'amuuwók sleémeero dír AAKOÓ MUNGÚ ti meer, inós kuúng u aleeslawtis. Heé hota ganaá' gu baloó mayká kuwa diinqisi.

²³ Ala kuúng Mungú, inooín in /araraa'ás tay baraá bohóngw qwanaay. Múk kuunday raa/atén nee fooluuse, hotangw'ín sleeme tla/atsara ga ayká. Ala Mungú aníng kuúng u harahhiíf.