WARA'AMI 52 - Biblía Axweesantá Hhohho' ar Mungú 2004

Sakwasleemár Mungú nee gurtleemuuwós

(Wara'amtá Daudi ar intsaahhasa qoomár Doegi, heé Edomu, iwa daqáy amór Saulo, nguwa báy, «Daudi aa dáh baraá doó Abimeleki.»)

¹ Ee kawa xu', kuúng a adór migusmoówoóke, ala misti xirfayeemís as tlakweemaawók? Sla'aarír Mungú ar warqawaaká i daadeer deelo sleémeero.

² Kuúng muruú tlákw un qoomeemés, lama an axwés umuú qoomaaro. Tsifraangók a adór asla.

³ Kuúng tlakweema ina ak gurií bá/ ta hhoeemaawo. Nee lama an ak slá' ta looeemaawo.

⁴ Kuúng tsífraangw, kuúng a al/aymusmoó úr. Asma /ayma'aá múk qwaareemisá' in ak slá'.

⁵ Ala Mungú, kuúng u fadu giqáy ay alhhe'eesay wasle. Un dafiit baraá do'ók wa ale, un amór saáw i kwaahh, un hingees baraá yaamaá múk slaáf wa ale.

⁶ Múk hota ganaá' tisíng gan ar, tari da'ayuut, turi waaqasén, tari oin,

⁷ «Ga/aawaak, laatí heewí an kudá' Mungú gwa dír guwaywós tleehhiiká. Ala aqo har daqaari'iimarós gana harahhiíf, nee diihhooa gari baraadá' wa leelehhiít.»

⁸ Ala aníng a adór xa'anoó naá/ oo seituúni, oo naa baraá Doó Mungú wa ti'iit. Sla'aarír Mungú ar warqawaaká an harahhiíf, ay kureeraá kureér.

⁹ Mungú, án kuúng un sluufmiís daqisleém, asma muruú taa tléhh. Aníng adór kuúng tur hhoó' a alki/iít dír mukoge.