WARA'AMI 50 - Biblía Axweesantá Hhohho' ar Mungú 2004

Xirfayeemisuú ló'

(Wara'amtá Asafu)

¹ AAKOÓ MUNGÚ, Munguú Aleesleemusmo, in axwees, múk baraá hhapeemo sleémeero gun amoorós i ateetín da/aáw wa tleemu ay /uwa.

² Iimír baraá Siyoniro, gixsadá' ló'wa hhoohhoo', gwa/aateemaá Mungú i qwiirii/iyá' adór tsee/amá.

³ Munguúrén ni hardah, slám ni qawti hardihiiká, asltá /ayiim i dír geeraawós wa hi'ít, nee bambaaór duhhúm i fukuukú' nguwa harwedit badu sleémeero.

⁴ Doori nee yaamu giri ateet, mukós guri sakwasleemuut.

⁵ «Muk'eé' kudaá inkihhím burumburaare', Kudá' alqadu ngaa dir'eéní tleehhiye' ar ilahhooár muruú ta tsu/i.»

⁶ Doori gan'amuuwós ngu alki/iitiyá'. Asma Mungú inós an sakwasleemusmo.

⁷ «Kuungaá muk'eé', iia qaasaak, gár ni oo' i deer. Israeli, adór kuúng tay diri' ngi lamabuú'. Aníng an Mungú, aníng a Munguúwók.

⁸ U iigahhamitaaká as ilahhooarók tidár muruú ta tsu/i, nee ilahhooarók ar da/a i dír geeraaeé' qooma sleémeero.

⁹ Awuú baraá guruú do'ók u yaahasaaká, tam gurtuú baraá matla/aangók sleeme.

¹⁰ Asma umuúqo makiito'ooro ar baraá sla/a a te'eé'. Nee daqooroó makaay oo gawaá tlom'i oo kume a kwe'eé'.

¹¹ Tsir/ór gáwtí tlatlaw sleémeero a xuú'. Umuúqo gár slafa ar baraá aya a te'eé'.»

¹² «Geeraawo bar aníng an qwariita, un qo ádbawaaká. Asma yaamu a kwe'eé', tam muruú daanduú yaamu a kwe'eé'.

¹³ Xáy, fu'unaá awee in /áya? Laqaá tseerdaá aara in wahaáma?

¹⁴ Mungú ilahhooár sluufáy duxuumeek. Al'axweesantók boo/eeseek dír kudá' gáwtí diriia.

¹⁵ Án ateetáng deelór slahh'amaayeero. Án kuúng u ba/amís, aníng iri xirfayés.»

¹⁶ Ala Mungú tlakusmo gu babay, «A milá kuúng gár kaahir'eé' kas alki/it, nee alqador'eé' gár kas axwes ar afkók?

¹⁷ Asma kuúng naanaqtaeé' aga áhh. Nee axweesanay'eé' ugwa aluuwógí kwáhh.

¹⁸ Barnaxes fisusmo ugwa aán, an mulqumoowók, slám nee fuquuse an aldinku'uumisá'.»

¹⁹ «Afkók ugwa algeemeér muruú tlákw nguwa alki/iiti. Nee tsifraangók lama gan axwees.

²⁰ Aga iwít hhiyaawók kuwa kaantiin, garmoó aayoorók ugwa /aysántí tsát.

²¹ Adoorí an adoodá' taa tléhh, aníng nay xasliít. Kuúng kawa xu' aníng aqo adór kuúng. Ala aníng kuúng u iigahhaát, muruuwí sleémeero ngu geehhoeés dír geeraawógí alé.»

²² «Tí alhooreesaak, kuungaásingá aníng i gunqaaremisá', án kuungá' munduwa karslamiís, tam heé nu tuú/ iri qwaar.

²³ Kudá' aníng i ilahhooár sluufáy duxuúm, an kudá' aníng i xirfayeemiís. Heé digir waketiingós gwaa qoomees aníng u ba/amís!»