WARA'AMI 5 - Biblía Axweesantá Hhohho' ar Mungú 2004

Firo as baqmoó

(Wara'amtá Daudi)

¹ AAKOÓ MUNGÚ, axweesante'eé' iiárií qaaseek, /ifór gurhaamír /aa/ee'eé' iiárií qaaseek.

² Afór /aa/ee'eé' axaaseek, Aakoó Munguúeé' nee Waawutmooeé', asma kuúng an kudá' án ni fiririim.

³ AAKOÓ MUNGÚ, matlaatleero afor'eé' iiárií qaaseek. Matlaatleero án ti amohhe'eés sluufay'eé' nguwa dirógí oo', nee uri daám.

⁴ Kuúng a Mungú muruú tlákw sla'aaká. Heé tlakusmo u ya/aandaaká iwa dirógí tseewuy.

⁵ Múk daara/uuse i geeraawók i sihhiitiiká. Kuúng kudá' sleémeero tlakweemaá tlehhiitá' in ahhít.

⁶ Lamuuse sleémeero a hhaamís. In ahhít kudá' tsu/utár muu ngi sla'á' nee awa al/aymuuse.

⁷ Ala as yaareemaá sla'aarirók ar warqawaaká, aníng an dáh baraá Do'ók oo hhoohhoó'. Ar ilaiwa/ameero un i tumbarara'aát, uri sluufiís baraadá' wa ale.

⁸ AAKOÓ MUNGÚ, án geeraharáng ar gan'amuwók, asma wakuuser'eé' ka yaariir. Loohirók gan'aasang dír geeraeene.

⁹ Axweesanoó wakuuser'eé' i looeemaá konká, gár i slaiya' aqo hhita. Baraá afer'ine axweesanoó ti'iimiít oo al/ayma. Afer'ín i háts axweesanoó tsu/utár muko.

¹⁰ Mungú, kuká' hhaamiiseek! Maweek kwasleemaduuín kudá' tlakw ngi saki/iye'. Tlatlahhaseek asma tlakweemaaín kudá' yaariir. Tlatlahhaseek as kuúng ugwa si'iyé'.

¹¹ Ala kudá' sleémeero na amoorógí guwiye' i qwalaala/iye'. Daqisleém i daaiye' ar bara/. Inooín kuúng na de'eemeek. Kudá' umuuwók ngu sla'á', kuúng un sa qwalaala/iyá'.

¹² AAKOÓ MUNGÚ, kuúng kudaádá' hota ganaa'á' in tsúq. In báq ar hhooeemawók adór gaamboót.