WARA'AMI 49 - Biblía Axweesantá Hhohho' ar Mungú 2004

Daktu'uumár harahhifór daqaari'iima

(Wara'amtá daaqoó Kora)

¹ Kuungaá muu sleémeero, kaangwí iiárií qaasaak, kuungaá yaamaá hootá' iiaa sihhaak.

² Múk urén nee múk ninakwe sleémeero, daqaare nee narkuuteero.

³ Afkwe'eene axweesanoó sagalooa un axweés. Inslawoó baraá muunaáeé' oo dahar.

⁴ Iia an qaás axweesantá bo/ ngiwa tsaahh, sinikar'eé' an gwa/atís ar daa'ángw gidaandoori.

⁵ Aníng gár nis daimiit a milá tsaxwawo, qoomár birta harweér nee tlakweema.

⁶ Inooín a múk harahhifor'ín gaa qaas gawaá daqaari'iimar'ín, slám tan waahhamín as daqaari'iimar'ín kawa yaariír.

⁷ Ar looeemawo hee kilós ba/amisaro ti aleeslayká, tam gár i haniisi kitángw slafiingose i káhh dír Munguhe.

⁸ Asma bu'utuú slafíngw hee ku gawít. Gár bu'uut ga baloó aleeslayká duuxaro,

⁹ iwa slafafin kureerisleém, as iwa baloó gwaaiiká.

¹⁰ Kár ee, inós gan ar tam adór múk sageloén ir qatli, daktana nee baraawasluuse tan adoodár hhán sleeme, daqaari'iimar'ín kari dír múk hatlá' i geexáy.

¹¹ /Aantuuín an dír hotangw'ín kureerisleém, an dír hotángw qari sleémeero, tam geeraawo yaamu ngaa kooín tleehhi'i.

¹² Hee tam ku diihhooe, i hotatinká daqisleém, aqo in gwaa' adór makiito'o.

¹³ Tí an tidá' gi slaw kudá' daktana ti harahhiifá', an adór alhhe'eesay'ín kudá' waahhamiimá' ar daqaari'iimar'ín.

¹⁴ Inooín kaa amohhe'eés adór bee/aangw, kiwa /aytisi ay baraá gi'i. Gwa'ara tari de'eemusmooín. Tari /eet baraá /aantí ale, gari qomtír wa ar tseewa alé. Slaqooín niri tsatitiyé' baraá /aantí ale, hotangw'ín tay baraá gi'i.

¹⁵ Ala Mungú aníng in tuu/ baraá /uuruú gwa'araro, nee inós aníng in ilaoh.

¹⁶ Ma daawimitaar daqaari'iimár hee bara aán, tam diihhooarós bira tláhh.

¹⁷ Bira gwaá', gár i huwi i káhh, tam xirfuuwós gu eehariiká tam ay baraadá'.

¹⁸ Hee tam i qwal/úr hooti baraá slafingose, tam ku xirfayeemisi as tlehhmi'iiwós awa hhohho',

¹⁹ ala inós iqo haragwaa' amoodár bariisér bál geera aa keér, amoodá' gwa/aateema ngiwa baloó ariiká.

²⁰ Hee tam ku diihhooe i hotaatinká daqisleém, aqo in gwaa' adór makiito'o.