WARA'AMI 47 - Biblía Axweesantá Hhohho' ar Mungú 2004

Mungú a waawutmoó yaamu sleémeero

(Wara'amtá daaqoó Kora)

¹ Kuungá' muu sleémeero tsa/i'i tahhaak, Mungú diidi'iimisaak ar daa'ángw bara/.

² Asma AAKOÓ MUNGÚ kuduú Aleesleemusmo, kudá' Gáwtí dirií', an kudá' dae tlaáq. Inós a waawutmoó úr oo yaamu sleémeero.

³ Xoordu ngina gawaá dabaarén i qaás, as kiwa sawaawuti'iimaan.

⁴ Inós yaamaá atén ta aalaan ngina tsawaár, yaamaá diihhoo' awa múk Israeli, kudá' aa slaá'.

⁵ Mungú aa tsa/án gawa ar bara/, AAKOÓ MUNGÚ aa tsa/án ar afór tarumbeéta.

⁶ Mungú sadaa'aak, eeít, daaé'! Waawutmoorén i daa'aak, eeít, i daa'aak!

⁷ Asma Mungú an waawutmoó yaamu sleémeero. Xirfuuwós daa'aak ar wara'ami!

⁸ Mungú xoordu gi sawaawuti'ín, Mungú aa iwiít gawaá kitaangós kudá' hhoohhoó' oo aleesleemu.

⁹ Geeraharuusér múk xoordu ta burumburiit dinkwa nee múk Munguú Abrahamu, asma /uuruú daanduú yaamu sleémeero an oo Mungú, inós aa ló'wa iia tleerúy!