WARA'AMI 45 - Biblía Axweesantá Hhohho' ar Mungú 2004

Daa'ángw duuxór waawutmo

(Wara'amtá daaqoó Kora ar intsaahhatimis. Daa'ángw sla'aari)

¹ Muunaáeé' aa haáts /ayma'aá hhoe. Waawutmo u daa'angw'eé' i daá'. Tsifrangw'eé' a adór kalaámuú goousmoó dawa inslaáhh.

² Kuúng tu ló'wa hhoohhoó' ta múk hatlae. Ar afkoge axweesanoó tsuuqaá huwahuúw un kát. Gawaá adoorihe Mungú kuúng ugwa tsuúq ay alhhe'eesay wasle.

³ Lawaalaarók qaaseek gawaá suuma, kuúnguusuú ilakaahaár, xirif a kók nee uraywo!

⁴ Baaliím, geera i kumiiteek ar /uuruuwók, looeema aleekalaa/eek nee tsaeema nee gan'amu, ar /uuruwoge muruú waa/oo/amo oo dae tlaáq u tléhh.

⁵ Waawutámo, maheeriwók i xaraasliyá', munér wakuuseerók ngin tlaquutiyá', muu nguri daraahhiyá' geeraawók i ale.

⁶ Mungú, kitaangók oo waawuti'iima i hotatin kureerisleém, Waawuti'iimarók a waawuti'iimár gan'amu.

⁷ Kuúng gan'amu una slá', malgweét ana áhh, gawaá adoorihe AAKOÓ MUNGÚ, kuduú Munguúwók, kuúng una iimbalaáx ar di/i as uwa waawutmoó wa qaasi, una qwal/atís ta waawituú hatlae.

⁸ Tsiitaywók sleémeero i tlatláy mooyángw manemanero, nee oo udi nee oo xaa'aá mdalasiniro. Kuúng taa qwal/atís nee afór daa'ángw mariímba, ar baraá maraá waawutmo awa taa parootuús ar xareemaá daawe.

⁹ Dasuú waawitá i baraá tla/ángw amami'iiwók kudá' ilaiwa/uuse, bihhaá dakók oo doó /iyayhe waawuto'o aa sihhít, tsiitaywós a tsiitoó sahaábuú yaamaá Ofirír daáhh.

¹⁰ Dási, axaás, qaytsiít, iiarók qaaseek, mukók gunqaareeseek nee doó baabuúwók sleeme,

¹¹ as waawutmo daqaní hhoohho'ariirók gay waatlakwees. Asma inós a aakoowók, kiíng na i tumbarara'ateek.

¹² Múk yaamaá Tiro ilahhooar'ín ngi huuw, daqaare ila' giri dirók i hhe'eemís.

¹³ Dasír waawutmo i baraá do', xáy i hhohh'aeér, tlabaawós an tlabaá taa tleéhh ar neewór sahaábu.

¹⁴ Kay huuw amór waawutmo ar tlabaawós kudá' taa parootuús. Nee /amaatliitedár mulqeerós iri eehariín aluuwós wa ale.

¹⁵ Kingay huuw ar qwala/ nee bara/, nay dát baraá doó waawutmoó i alé.

¹⁶ Daaqaywók i waawuti'in kitángw xwayliteérók wa ale, kuúng kiri geeraharuusér wa qás baraá yaamu sleémeero.

¹⁷ Umuuwók in iiaatleerúy baraá qari sleémeero as aníng. Gawaá adoorihe xoordu kuúng uri xirfayemiisiyá' ay kureerisleém.