WARA'AMI 44 - Biblía Axweesantá Hhohho' ar Mungú 2004

Firo as baqmoó

(Wara'amtá intsaahhatimiis ar daaqoó Kora)

¹ Aá Mungú, atén kuúng ugwa axaasaán iiaarene. Bariiseerén ar qaro, muruú kuúng taa tlehhít qarti'ine ngwa diréní alki/iitiyé', tlehhmi'iidaá iimír bál qaro.

² Kuúngú kilá' múk xoordaá hatlá' una tlatlahhás ar /uuruuwók, ala yaamuuín kiri mukók i dahás, xoordaá hatlá' kiri slahh'eemís, ala baabi'iirén kiri diihhooatís.

³ Mukók yaamu gaa hayohiiká ar xooslaá slaqwara, tam baali nga slay'iiká ar /uuruuín, ala nina baaliné' ar /uuruuwók, nee as kuúng tawa dinkwa nee inooín nee kiwa sla'.

⁴ Kuúng an waawutmooeé' nee Munguúeé', kuúng xwaylár Yakobo baalírií haniiseek.

⁵ Wakuuseerén an baalaán ar /uuruuwók, ar /uuruú umuwoge in yaamaá harakala/aán.

⁶ Aníng ga/aler'eé' a gár ni harahhifaaká, tam tiwa ba/amis ar paánga a aleeslawaaká.

⁷ Ala kuúng an kudá' atén taa ba/amis dír dabaá wakuuseerén wa ale, nee kudá' atén taa aahhiyé' ina amoqwaarés.

⁸ Mungú, atén ana xirfuutaán as kuúng qooma sleémeerowo, nee un sluufmamisaán kureerisleém.

⁹ Tam adoorihe kuúng ta daanduú xu'ús tiri mureekés. Slám nee slawemaá bartaarén taa alkoondi'iiká.

¹⁰ Kuúng atén tina tawó meér, wakuuseerén kari ilaguwaán. Inooín muruurén nguna leehhiyé' haasaáng wa ale.

¹¹ Atén tina meér tawa adór bee/ángw ta tsu/utár ay. Tiri diyayaá/ baraá xoordaá hatlá'.

¹² Mukók una weerís ar tlaxór niina, tam gár taa sleér i káhh.

¹³ Atén tina niqís dír ilaá inslaawayrene, tiri waqaseengw tleéhh nee waqa'ama dír kudá' atén taa harweeriye'.

¹⁴ Adór múk xoordu tiwa waaqaai ana tléhh. Inooín sager'ín ngin mumukumisiyá' as atén tiwa gaárí xuiiká.

¹⁵ Tlaatla/aangw sleémeero an murumiít, tam ilaaeé' qayta ngiri si'iyé' mureero,

¹⁶ qoomár axweesanoó /ooslislíngw waaqa'ama bura axaás, nee qoomár wakusmooeé' kudá' li/oó bu'utuú wa slaá' bura ár.

¹⁷ Tí sleémeero atén tina sleér, handá' tam atén kuúng ugwa gunqareesaniikahe, laqaá alqadoorók aga mawaniikahe.

¹⁸ Kuúng ugwa sianiiká baraá muneerene, laqaá aga paslaniiká baraá loohiroge.

¹⁹ Tam adoorihe atén kuúng taa kwáhh ay dír tawer i hooti, atén kuúng taa geexeér baraá ma/amír aa kiqit.

²⁰ Alók geeraawo barnaxes atén Munguúrén una mawaán ilaiwa/ameero, munguú hatlá' oo lama kuri ilaiwa/aán,

²¹ ahaá geeraawo Mungú gaa tsaáhhiíke? Asma inós sufuú baraá mune gun xuu'.

²² Ala as kuúng tiwa meér atén nee gwa'ara tin madiitaán daqisleém, tari adór bee/ángw ta tsu/utár ay.

²³ Tlawáng Aáko, mas gú', na'amaamís, tlawáng, miti siaar ay alhhe'eesay wasle!

²⁴ Ahaá waáy, direne masa nahhát, nee slahh'amuurén nee baramaanirene kiri gunqaarés?

²⁵ Ana xupuaán ay yaamu, gur'e kari yaamúr oohaán.

²⁶ Tlawáng, qwaláng ti alee/is! Atén ti ba/amis ar sla'aarirók ar warqawaaká!