WARA'AMI 42 - Biblía Axweesantá Hhohho' ar Mungú 2004

KITAÁBUÚ TSÁR ( War 42—72 ) Firór heé taa óh nee wakuuse

(Wara'amtá intsaahhatimiis ar daaqoó Kora)

¹ Adoodá' saaragi ma'aá yaae ngir ilatleerus, an adór án sleeme kuúng ur ilatleeruus, Munguúeé'.

² Muunaáeé' AAKOÓ MUNGÚ guna sa slahhaá' adór heé aa waxiit, Munguúdá' slaáf guna sa slahhaá'. A xaylá ni dír geeraawók i hardah, as kuúng uwa ar?

³ Tlaatla/aangw nee xweeraawo an /aa/amamiím, hhirhheerieé' nay adór muruú /aymar'eé' tleehhitiyé'. Tlaatla/aangw sleémeero muu in yaahamiis tawa kaahi, «Munguúwók i amá?»

⁴ Qoomár bar muruú aáng ugwa insláw, muunaáeé' in gurhaamuut. Asma qoomaadae tina alkoomakoomaán nee boo/oó úr, ngiri geerahaár tawa hardahaan amór Doó Mungú, boo/oó úr oo muu oo hi'imiít ar afór bara/ nee daa'ángw ilahhooa.

⁵ Aníng gár nis gurhamuut a milá? Nee mahar amoqwaqwadiím baraaeene? Mungú un harahhiíf, asma aníng u malé xirfayeés, kuduú alee/isusmooeé' nee Munguúeé'.

⁶ Aníng gurhaami iga ló'wa gás, gawaá adoorihe án kuúng ugwa insláw, iimír yaamaá Yordanír wa aleeró, iimír tloomár Hermoni nee ar Misari.

⁷ Aníng iga gurhaamír ar gás, a slaqás nee heé baraá tla/ángw iloó hhaahhoó ma'áy dirií', kwaáo umuú barto ma'aay in gawaeénár ohiná'.

⁸ AAKOÓ MUNGÚ tlaatla/aango sla'aarirós ar warqawaaká ngi laqán, nee xweeraawo aníng Munguú nir slaaf un firiím, nee un xirfayeés ar daa'aangw.

⁹ Mungú, tlaa/ar'eé' un baw, «Asma milá misa gunqaarés? Asma milá mas taamberuús ar tsuunqumis, wakusmo iwa baramaanuusi?»

¹⁰ Baramaanuuser'eé' i /ooslisliín tlaatla/aangw sleémeero, adór inkaahhoó sooní wa ale, tawa kaahi, «Munguúwók i amá?»

¹¹ Aníng gár nis gurhaamuut a milá? Nee mahar amoqwaqwadiím baraaeene? Mungú un harahhiíf. Asma aníng u malé xirfayeés, kuduú alee/isusmooeé' nee Munguúeé'.