WARA'AMI 41 - Biblía Axweesantá Hhohho' ar Mungú 2004

Firór heé tiqtusmo

(Wara'amtá Daudi)

¹ Heé amohhoó' a kudá' narkuute ga gaár i xuú', inós ku alee/iis nee AAKOÓ MUNGÚ baalár slahh'amuuwo.

² AAKOÓ MUNGÚ inós gu xún, nee slafiingós guri amohhe'ees, inós kuri bay a heé amohhoó' baraá yaamuwo. AAKOÓ MUNGÚ, kuúng inós u meeraaká baraá dabaá wakuuseerósí aleeró.

³ AAKOÓ MUNGÚ inós gun hubín baraá tiqtiro, nee gun hungu/uus baraá slahh'amuú tiqtirós sleémeero.

⁴ Aníng nari oó', «AAKOÓ MUNGÚ, aníng gurhhooár i tleehháng, aníng hungu/uusáng, asma aníng kuúng ugwa tlakweemaá i tleéhh.»

⁵ Wakuuser'eé' i muruú tlákw i slá', tawa kaahi, «Kár, xaylá i gwaai? Nee xaylá umuuwós ku may?»

⁶ Barnaxes hee bira neetleesi áy, gaa a muruú tawo gun kah, ala baraá muunaáwose tlakweema gin aldakuut. Inós bira tsee/aá i ti'iít, muruuwí guri alki/iit.

⁷ Kudá' sleémeero aníng i ahhiitá' i dinkwár wa daandueé' saasahhaná', muruú tlákw ngun aníng ár slaiyá'.

⁸ Ta kaahi, «Tiqtír tlakw gwa ohihiín, tiqae naxooro i baloó tu/uutiiká.»

⁹ Tam mulqumooeé' kudá' afhhamít, kudá' naa harahhiíf, kudá' nee aníng al/ayayimá', inós iga sakií/.

¹⁰ Ala AAKOÓ MUNGÚ, kuúng án gurhhooár i tleehháng, aníng alee/iisáng niwa sihhiit as marmár'eé' ngiwa buu'.

¹¹ Barnaxes wakusmooeé' aníng iga arba/iiká, daqaní aníng a xuú' adór aníng kuúng ir slá'.

¹² Ala ar baraá hhooeemaeene kuúng aníng iga baraá dabaawógí ót, nee iga geeraawógí qás ay kureeraá kureér.

¹³ AAKOÓ MUNGÚ, Munguú Israeli, i xirfuuti, iimír iimu/uungw waslér wa ale ay alhhe'eesay wasle. Amin. Amin.