WARA'AMI 40 - Biblía Axweesantá Hhohho' ar Mungú 2004

Daa'ángw diidi'iimis

(Wara'amtá Daudi)

¹ Aníng AAKOÓ MUNGÚ una daám ar qitla, /aa/ee'eé' giri iiárií qaás, niri amor'eé' i warqáy.

² Ina duúx baraá tsaxwaá baa'ár wa ale, baraá tsal'ír buunqa. Iri sihhtís gawaá daanduú tlaa/a, niri hi'imiít ar amohhooa.

³ Daa'ángw /abén nguna intsaahhatís dir'eéni alé, oo xirfuú Munguúrén, múk yaariír adoorí gari ar, nee tay da'ayuut, naagáy AAKOÓ MUNGÚ kway harahhiif.

⁴ Heé amohhoó' a kudá' AAKOÓ MUNGÚ gu harahhiíf, kudá' nee daara/uuse al'eemaeema'aaká, laqaá kudá' warqawaaká amór munguaá hatlá' ngiwa sluufmiisi.

⁵ AAKOÓ MUNGÚ, kuúng muruú yaariír oo waa/oo/amór koóm ugwa tléhh, nee inslawaywók daanduurene ku úr. Heé ta kuúng ar qoomeesi i kaahh. Tí sleémeero bar alki/ituú wa slaá' nee daharemisuuwo, ka ló'wa yaariir tam alki/ituuwo a aleeslawaaká.

⁶ Kuúng ilahhooár muruú ta tsu/i nee ilahhooár hatlae i waatlakweemiská, iga iia fooxís gawaá tihe. Ilahhooár da/a nee ilahhooár tlakweema hingeemis kuúng a waatlakweemiská.

⁷ Naagáy aníng niri oó', «Án areeng aga ya/aám, adoodá' tir hariím kaa gooín baraá kitaábuú hara'aya.

⁸ Munguúeé', aníng a qwalaalaá/ sla'aarirók ngiwa tlehhiit, dabeerók i baraá muunaáeé' i dirí'.»

⁹ AAKOÓ MUNGÚ, aníng ya/abtór hho' ar ba/ama ana alki/iít dír dinkwár múk yaariír i alé. AAKOÓ MUNGÚ, kuúng a xú' adór aníng afkwe'eé' ngura ar qahuutiiká.

¹⁰ Aníng ba/amarók aga ar xasliitiiká baraá muunaáeé'. Aníng inkihhimuwók ugwa alki/iít, nee ba/amaroge. Án sla'aarirók ar warqawaaká aga lu/iiká nee inkihhimuuwoge dír múk yaariire.

¹¹ Kuúng AAKOÓ MUNGÚ, mi /itaar gurtleemuwoge! Aníng amohhe'eemisáng ar sla'aarirók ar warqawaaká nee inkihhimuuwoge.

Firo as alee/isaay

¹² Asma tlakwér faarooro ta aleeslayká aníng iga harwét, tlakweemaaeé' iga nagwaahhiyé', tam gár ni ar i káhh. Tlakweemaeé' naa ló'wa tlahhiyé', se'éngw sagw'eé' ba/a, /uuruú nir kumiit i kaahh.

¹³ AAKOÓ MUNGÚ, na'amaamís án ba/amisáng, AAKOÓ MUNGÚ, án alee/iisáng ar gaanslaay.

¹⁴ Ki mureekeesi i amoqwaariye', kudá' slafingw'eé' leelehhiitá' nguwa qwaareesiya'. Ki alií ki/isi ki mureekeesi, kudá' slahh'amaayer'eé' ngi sa qwalala/á'.

¹⁵ Kudá' aníng wa qaseesemá' tawa kaahi, «Ha-ha-ha,» i hasl'amitiye' mureero.

¹⁶ Ala kudá' sleémeero kuúng leelehhiitá' ta baraa/i, tu sa qwalaala/i. Kudá' ba/amarók sla'á', deelo sleémeerowo ta oi, «AAKOÓ MUNGÚ ku úr!»

¹⁷ Aníng a liitlakusmo nee a heé gaa wásl, ala AAKOÓ MUNGÚ in sa daawimiit. Kuúng a alee/isusmooeé' nee gweerusmooeé'. Munguúeé', kuúng mindi tligaar!