WARA'AMI 4 - Biblía Axweesantá Hhohho' ar Mungú 2004

Firór tsiindo as alee/isaay

(Wara'amtá Daudi)

¹ Mungú, kuúng an Munguúeé' oo gan'amuú koóm, firor'eé' iiárií qaaseek qoomár bur ateetiím. Ina alee/ís qoomár niwa slahh'amkuú koom. Án gurtlawáng, firor'eé' iiárií qaaseek.

² Kuungaá muu, ay xaylá umuueé' ku tli/imamisa'? Ay xaylá axweesanoó tawo kuwa sla'a' nee lameemo kiwa eeharahada'?

³ Ala xuaak adór AAKOÓ MUNGÚ heé ganaá' ngura tsawaár guri kós tleéhh. AAKOÓ MUNGÚ i axamiis qoomár bur ateetiím.

⁴ Kuungá' bara buhhabuhhé', ti harmagahhe' tlakweema mi tleehhara', tí aldakuutaak qoomár bar aga xaslté' gawaá qateenoohúngí ale,

⁵ Ilahhooár ganaa' ar muruú ta tsu/i hanmisaak, nee AAKOÓ MUNGÚ na harahhifaak.

⁶ Awa yaariir i kaahiya', «Heé hhooa ngi atén i laqaám a heemá? AAKOÓ MUNGÚ, atén ti i qaytsit ar gurtleemu.»

⁷ Kuúng muunaáeé' ugwa ló'wa qwal/atís ta ak kudá' taa bu'úngw yaariír i haniisi, nee difaáír yaariire.

⁸ Aníng an qaát, nari guú' ar wayda, asma kuúng, AAKOÓ MUNGÚ, aníng iga de'eén niwa hoot ar amohhooa.