WARA'AMI 39 - Biblía Axweesantá Hhohho' ar Mungú 2004

Firór heé slahhahhaá'

(Wara'amtá Daudi)

¹ Ana oó', «Inkihhimu un tleéhh baraá muruudá' ni tlehhiita, as kahhó' mawa dakuús. Afkwe'eé' un har óh, qoomár múk tlákw bira haratseewúy.»

² Aníng an adór afaa wasli, ana xasliít, ala amohhooa a slaslawaaká, nari ló'wa slahhaá'.

³ Ana daawimiít muunaáeé' iri slahhaá'. Adoorí ngiwa aldakuut gurhaami ina ak albúhh. Naagáy afkwe'eene niri axweés, niri oó',

⁴ «AÁKO, alhhe'eesay'eé' xu'utisang. Deelór hootaaeé' daanduú yaamuwo a magá'? Ngi xuú' adór slafingw'eé' ir gaanslár waaraahhi.»

⁵ Ga/aaweek, deelor'eé' aga niinawés, slafingw'eé' a adór gaarooká geeraawoge. Umuúqo heewo a adór kahhaay.

⁶ Hee i waaraahh adór geehhantmoó wa ale. Waayaawós nee /ifooro a tawo, i muruú burumburín, ala heé gu sláw gu xuiiká.

⁷ Nee hám heé hatlá' oo ni harahhiif a heemá, AAKOÓ MUNGÚ? Harahhifor'eé' a dirók.

⁸ Aníng ba/amisáng, baraá tlakweemaaeé' sleémeero. Ma ya/aamaar daktana aníng iwa niqimis.

⁹ Aga xasliít afkwe'eé' ugwa mutsutsuú'. Asma kuúng an kudá' adoorí gaa tleehh.

¹⁰ Na'ás, mawáng muxtaaro. Asma muxtár dabaawók iga afkú bohóngwí qás.

¹¹ Kuúng hee bura iigahhát, kuri múx asma tlakweemaawós, hhoohhooarirós an hiingés tari adór kaahartá tlusá /aáy. Looeemaá kilae umuúqo hee a adór kahhaay.

¹² AAKOÓ MUNGÚ, firor'eé' axaaseek, /aa/ee'eé' iiárií qaaseek, ma xasliitaar qoomár bar /aa/amiím! Asma aníng a dahaaymoowók oo waaraáhh, aausmo adór baabi'iieé' sleémeero.

¹³ Áx, ala mawáng mi slahh'eemisaar, fur'ár niiná i slahh as niwa qwalaa/ gár niinawe, dír nira gwaaiiká.