WARA'AMI 38 - Biblía Axweesantá Hhohho' ar Mungú 2004

Firór heé slahhahhaá'

(Wara'amtá Daudi. Daa'ángw tsuunqumis)

¹ AAKOÓ MUNGÚ, án mi iigahhaataar ar buhhtaawók, tam bar aga qa/ít buhhtaawo, muxtaaro mi dákwí tleesaar.

² Asma án iga tsaxát ar maheeriiwók nee dakók iga al iilooúy.

³ Slaqwtaeé' sleémeero aa slahhá' asma buhhtaawók. Fadueé' naa slahhaiyé' asma kuúng ugwa sadakuús.

⁴ Tlakweemaaeé' naa tlahhiyé', iri harahuiyé' adór alwuór ma'aay. Ina al iilouyé' adór huwár gagaararo ni aleeslawaaká.

⁵ Inkaahhi'iieé' naa tli/iyé' niri tsutsuiyé' niri malalahhiyé' asma kuúng ugwa aáhh.

⁶ Slahh'amaaye ina qwaambatís. Tlaatla/aangw sleémeero ana toonganumaamiís ar tsuunqumis.

⁷ Slaqwtaeé' i duurú' adór asla. Slahh'amaayerí iga hhaasuúr.

⁸ Ana naasuút niri nor'omiít, ana /ifaafiím as slahh'amaaye.

⁹ AAKOÓ MUNGÚ, tidá' sleémeero ni slaa' kuúng a xú', niwa /aa/amiim ar /ifo ti geetlakweeká diroge.

¹⁰ Muunaáeé' i tuu'uut, /uuruueé' aa faák, ilaaeé' sleeme naa boo/ayé'.

¹¹ Mulqer'eé' nee mukdá' aníng i slaá', ta amór saáw i sihhiít qoomár slahh'amaayer'eene. Múk dooeé' sleeme tana amór saáw i sihhiít.

¹² Mukdá' aníng i gaasár wa slaá', tsaaxwel kun qamín, kudá' aníng i gár tlaákw ar sla'á' ta qwaareesar'eé' axwees, nee tlaatla/angw sleémeero ta lohaá aldakuut awa adór tir dahhi.

¹³ Ala aníng an adór matooyi, a axamisaaká. Aníng an adór afaa wasli, axweesani a aleeslawaaká.

¹⁴ Eeít, aníng a adór heé axamisaaká, nee adór heé aleekalaa/aro ti aleeslawaaká.

¹⁵ Ala AAKOÓ MUNGÚ, aníng kuúng una harahhiíf, nee an kuúng, AAKOÓ Munguúeé', oo aníng i mu/aywaáts.

¹⁶ Án kuúng u firiím, «Wakuuser'eé' miwa qwalaalá/ as slahh'amueé', mitiwa xirfayeesiyé' daanduú huu'umaeene.»

¹⁷ Daxta a baraá tsaxwaá niwa lak huu', nee aníng a baraá slahh'amu daqisleém.

¹⁸ Ala tlehhmi'iieé' awa tlakw in hhu'u'uúm, gurhaami ina ót as tlakweemaaeé'.

¹⁹ Wakuuser'eé' ka slaqo hho' nee i /uuruú koón. Inooínaadá' aníng i tawo ahhiitá' ki yaariir.

²⁰ Kudá' aníng i tlakweemaá i tlehhiitá' as hhooeema ngiwa tleéhh, inooín a wakuuser'eé' asma aníng gár naa gurií baá/ a hhooeema.

²¹ AAKOÓ MUNGÚ, kuúng aníng mi kwahhaar! Munguúeé', dir'eene ma sawesaar.

²² Gaansluutáng, /iisáng, AAKOÓ MUNGÚ, kuúng a ba/amusmooeé'!