WARA'AMI 37 - Biblía Axweesantá Hhohho' ar Mungú 2004

Slafiingók haniiseek dír AAKOÓ MUNGÚ

(Wara'amtá Daudi)

¹ Kuúng ma daawimitaar as kudá' tlakweemaá tlehhiitá', tam mi waatlakwemisaar kudá' muruú tlákw tlehhiitá'.

² Asma nin tseewa kahiyá' adór gitso, nin /ootsiyá' adór hatlitú wa ale.

³ AAKOÓ MUNGÚ haratlintieek, muruú hhó' tlehhiteek, daqaní a hót ar saxareema baraá yaamuwo.

⁴ Qwal/uuwók baraá AAKOÓ MUNGÚ tiwa sleer, daqaní inós tidá' kuúng ta sla' baraá muunaáwoge ngi haniis.

⁵ Slafiingók haniiseek dír AAKOÓ MUNGÚ, inós harahhifeek, daqaní inós kuúng u alee/iis.

⁶ Inós ngi geehhoees adór kuúng tar gana', gan'amuuwók iri geehhooúy adór tsee/amuú qoomár /ametleemu.

⁷ Dír AAKOÓ MUNGÚ i xasliiteek, inós ku daán ar qitla. Kurkeér heé adoorós tidá' ar al/ayma ga ya/a/aám, nee mukdá' lohuín kudá' tlakw ngaa muruú wa slaye'.

⁸ Mune gu/eek, buhhta maweek, ma buhhabuhhaar asma alhhe'eesaywo a tlakweema in tléhh.

⁹ Asma múk muruú tlákw tlehhiít ku qwaarees. Ala múk AAKOÓ MUNGÚ daamaraám an kudá' yaamu gi aál.

¹⁰ Alaá deelór niinawe kudaá tlakuuse ki qwaarees. Tim leelehhtuú eér dír hotaaínií alé i aandaaká.

¹¹ Ala kudá' tsatsa'aren yaamu ngin aaliyá'. Nin qwalaala/iyá' baraá diihhooár faakaaká wa ale.

¹² Tlakuusmo heé hota ganaá' gun geewaqaqatín, nee gun /atlií /aay.

¹³ Ala AAKOÓ MUNGÚ gun wa qasén kudá' tlaákw, asma gaa ár adór deeloorós ar alhhe'eesaay nira naká/.

¹⁴ Múk tlákw tsat'ii'ín ngin tataahhiyá' nee ga/alduín ngin oohiyá', as múk narkuute nee liitlakuuse kiwa tsu/i, sleeme kudá' adór hho' ar hootá' kiwa tsu/i.

¹⁵ Ala tsati'ii'ín kudá' ngin i ki/iyá', inooínadaá kilá', nee ga/alduín kudá' sleeme nay qeqtiná'.

¹⁶ Daqaari'iimár niina ar heé hhoó' i kon ka afhhamít ta ak daqaari'iimár yaariir ar múk tlakwe.

¹⁷ Kudá' tlakuuse AAKOÓ MUNGÚ gi dabe giqáy, ala AAKOÓ MUNGÚ mukdá' hota ganaá' gun /uurií dook.

¹⁸ AAKOÓ MUNGÚ slafíngw múk xaslxaansli wásl gu amohhe'emiis. Inooín a múk aaliím ay kureeraá kureér.

¹⁹ Inooín ki mureekeesiiká qoomár tlaakwe, kureeraá giyeede inooín i /ayiná'.

²⁰ Ala kudá' tlakw i qwaariyá', kudá' AAKOÓ MUNGÚ ngwa aahhiye' nin kahiyá' adór /ayór wa ale, nay ilaá wa qwaariyá' adór quuír wa ale.

²¹ Heé tlaákw gaa binga kiriík, ga buiiká. Ala heé hota ganaá' gurhhooa tinar hanmiis.

²² Múk taa tsuúq nee AAKOÓ MUNGÚ, yaamu ngi aaliyá'. Ala kudá' inós aa lu'ús, gi qwaarees.

²³ AAKOÓ MUNGÚ an kudá' digirwakeetíngw hee gu geeraharahaár, kudá' inós gu qwal/atimiís, gu de'én.

²⁴ Heé adoorí tim nikiitsi i huuiiká yaamií ale, asma AAKOÓ MUNGÚ inós gun oh ar dabaawós awa kilá'.

²⁵ Iimír án tawa na/aay, nee ala hamí aga diím, ugwa ariiká heé hota ganaá' oo taa máy nee Mungú, laqaá na/aá do'ós niwa pasltár hi'imiitiya', as iwa muruú /aymár firirina'.

²⁶ Qooma sleémeero ku hhoó', i kirkitimis, nee do'ós ku tsuuq as na/iiwós.

²⁷ Ti paratl dír tlakweemaawo, hhooeema tleehheek, daqaní a hót ay kureeraá kureér.

²⁸ Asma AAKOÓ MUNGÚ sakwasleemár ganaa' ga slaa', tam mukós kudá' hhohhó' gu baseehuwiiká. Heé hota ganaá' gu de'én ay alhhe'eesay wasle. Ala xwaylár heé tlakusmo gan qwaarees.

²⁹ Múk hota ganaá' yaamu gi aal. Inooín nay baraadá' wa hootiyá' ay kureeraá kureér.

³⁰ Heé hota ganaá', muruú sagalooa gun axwees. Nee afkose sakwasleemár ganaa' gan axwees.

³¹ Dabér Munguúwós i baraá muunaáwós i dirí'. Baraá hotaangose tlakweema gi tleehhiiká.

³² Heé hota ganaa'aaká, heé hota ganaá' gun haramamahhamiit, nee adór ngur gaasi gan leelehhiit.

³³ AAKOÓ MUNGÚ heé hota ganaá' gu mayká gawaá /uuruú tlakusmo, sleeme gu ya/anká sakwasleemaro kuwa baali nee tlakusmo.

³⁴ Kuúng AAKOÓ MUNGÚ na harahhiifeek, loohirós eehareek. Inós kuúng u iiatleerees, yaamu kay ál. Múk tlákw adór kur qwaareesi a aán.

³⁵ Heé tlaákw una ár adór ir ló'wa xaraasli. Tina tsaafiís adór haleemaá xaa'aá miereési ar gawaá tloomár Lebanoni.

³⁶ Ala aníng niwa waaraáhh, ugwa ariiká, una mak leeleéhh naxés i kaahh.

³⁷ Heé ganaá' ló'wa alhooreeseek, heé inkihhím ga/aaweek. Asma heé tsá', yaeemirós ka tleer.

³⁸ Ala múk daba' tlákw sleémeero kun hhaamiis, nee kudaá tlakuuse sleémeero yaeemir'ín i qwát.

³⁹ Nee ba/amár múk hota ganaá' ni amór AAKOÓ MUNGÚ dáhh. Asma inós an baqmoó qoomár slahh'amko.

⁴⁰ AAKOÓ MUNGÚ gin alee/iimiis nee gin ba/amis. Gin tu/ún baraá dabaá múk tlákw wa ale, nee gin ba/amis. Asma inós ngwa i guwiyé'.