WARA'AMI 36 - Biblía Axweesantá Hhohho' ar Mungú 2004

Tlakweemá hee

(Dír sagadiyusmoó AAKOÓ MUNGÚ. Wara'amtá Daudi)

¹ Tlakweema i baraá muunuú tlakusmoó wa tlupiitiyá', Ilaiwa/amér Mungú i káhh dirose.

² Birta i qaytsiít, tin kilós hheehhe'eemiis, asma tlakweemaawós mikiwa tsaáhh as kahhó' mukuwa aáhh.

³ Ala inós a lamusmo nee foolusmo, sagalooa nee tlehhma'aá hhohho' gaa máy.

⁴ Muruú tlákw oo i tleehhamór wa slai gun aldakuut gawaá qatuuwós wa ale. Tin dahmiis baraá lohaá tlakw, inós muruú tlákw gun eeharahaar.

Hhooeemaá Mungú

⁵ AAKOÓ MUNGÚ, sla'aarirók ar warqawaaká ka qoomay wasl, inkihhimuuwók i deer umuúqo diiro.

⁶ Gan'amuuwók a adór tlom'aá uren, sakwasleemarók a adór iltá tlawi, AAKOÓ MUNGÚ, kuúng muu nee makaywo in de'eén.

⁷ AAKOÓ MUNGÚ, sla'aarirók ar warqawaaká ka ló'wa xiríf, muu in gogoow baraá mahhtuú hhampe'eeriwók i alé.

⁸ In aaxís ar du/ú do'ók, hhooeemaawók i wa/aminá' adór ma'aá yaae, mukók gin wahán.

⁹ Asma diroge kutloó ma'aá slafiingw i deer, baraá gwa/aateemaawoge atén gwa/aateema i araán.

¹⁰ Sla'aarirók ar warqawaaká alkoomeek dír kudá' kuú xuá', nee ba/amarók i dír kudá' hota ganaa'á' baraá muner'ine.

¹¹ Múk daara/aám ma ya/aamaar iwa yaamaá hara'adaahi, laqaá tlakuuse ma ya/aamaar iwa guusiya'.

¹² Qaytsiít, múk muruú tlákw tlehhahhiít adór ira huuhu'ún, ki yaamií daahh tam i baloó sihhitiaaká.