WARA'AMI 35 - Biblía Axweesantá Hhohho' ar Mungú 2004

Firo as alee/isaay

(Wara'amtá Daudi)

¹ AAKOÓ MUNGÚ kudá' aníng i il/aamá', ila/eek, aleeslaqwáng dír mukdá' nee án slaqwa'a.

² Gaamboórók oohang, nee baqamoorók, qwaláng aníng alee/iisáng.

³ Lawaalarók nee tsatoó siímero oohang, wakuuser'eé' ila/eek. Daqaní adór aníng ir ba/amis ngi ó'.

⁴ Kudá' aníng i gaasár wa sla'á' na mureekeeseek, nee ki ar ba/i. Inooinaadá' anií baraá tsaxwáy dahmiisá', inooín awa kilá' tsaxwaadá' ngi slaye', ni amoqwaariye'.

⁵ Ta adór mundoó fur'a ir tlatleer tleehhiti, malaykamoó AAKOÓ MUNGÚ ngi haritleesi.

⁶ Loohir'ín i gip nee i ninkiritsimitiye', malaykamoó AAKOÓ MUNGÚ ngi alkon.

⁷ Asma ina tawo tsaaxweelírí qaasiyé', iri bohóngw i fooliyé'.

⁸ Inooínaá kilá' i hhane', nee tsaaxweelidá' naa qaasiyé' ngi ohiin, sleémeero i baraadií qororo'otiye'.

⁹ Aníng AAKOÓ MUNGÚ u sa qwalaalaá/ nee ba/amaarós an sa baraá/.

¹⁰ Aníng AAKOÓ MUNGÚ nguri baw ar muunaáeé' sleémeero, «AAKOÓ MUNGÚ, oo adór kuúng i kaahh. Kuúng liitlakuuse a ba/amiimís baraá dabaá múk /uuruú kooma. Eeít, narkutmo nee heé dawa kaahaár u ba/amís baraá dabaá malguuseero.»

¹¹ Lamabu'uusér /aytuuse i sakwasleemút, asma muruú ni xuaaká. Muruú ni xuaaká ngun aníng i yaahamiisiyá'.

¹² Hhooeemaeé' ngin bu'uná' ar tlakweema, aníng aga deewaá'.

¹³ Ala inooín niwa tiqiyé', aníng tlabaá hheehhe'eemiis ina tsiít as gurhaami laqaama. Ana slahhaá' niri gwaawiím, sagw'eé' una xupu'uús as niwa fiririim.

¹⁴ Tina adór heé mulqumo laáq oo hhiyaawós alee/aa/amiím. Tambeera ina áy as gurhaami, adór heé tsuunqumiís as gwa'arár aayírós.

¹⁵ Qoomár aníng niwa slahhahhaá' inooín tana qwalaá/, tari burumburiít as tiwa niqin, múk ni xuaaká án i muux, tam heé gi har'ohiím i kaahh.

¹⁶ Mukdá' liitlakuusér wa niqiím, aníng in /atlií /aay.

¹⁷ AAKOÓ MUNGÚ, ay xaylá ta xumaamis? Ba/amisáng baraá /awaa/awingw'ine, slafingw'eé' tu/ang dír direerikae.

¹⁸ Daqaní án kuúng u sluufmiís dír burumburitár múk yaariire, nee uri xirfayeemiís dír tla/ángw boo/oó yaariire.

¹⁹ Aníng bar gurhaamuút ma ya/aamaar wakuuser'eé' án iwa waaqaseen. Kuká' aníng i tawo ahhiitá', slahh'amaayer'eé' mingiwa saqwalaa/iyé'.

²⁰ Axweesanoó i axweesiya' oo wayduwooká. /Ayseeno ngin tlaaqiyá' dír múk wayduú sla'a.

²¹ Aníng ina iigahhaatiyé' ta kaahi, «Lala lalala, ar taa /imís aga hhoó araán.»

²² Ala kuúng tí aga aán! Ma xasliitaar! AAKOÓ MUNGÚ, ma saweesaar dir'eene!

²³ AAKOÓ MUNGÚ, tlawáng sihhiitáng, án aleekalaa/áng, qwaláng Aakoó Munguúeé', án aleeawáng.

²⁴ AÁKO waáy, Munguúeé', kuúng a gan'amuú koón. Adór án tar heé hota ganaá' waahheek. Wakuuser'eé' ma algeemawaar aníng iwa niqimis.

²⁵ Pa/aangw munguwa slayé' oo tawa kilooín ooi, «Ala ma hhaslitaán adoodá' ta sla'aan aga slawaán.» Matawa oó', «Ugwa suqtisán.»

²⁶ Kwisingá' slahha'amkwe'eé' ngu saqwalaala/á', ki mureekeesi i amoqwaariye'. Kuká' sleémeero ti gan'ámkwí harafadiitá' ta aninge, ki mureekeesi nee alsi'imu ngu ariye'.

²⁷ Kudá' waangexwaarar'eé' ngi sa qwalaala/á', i baraa/iye' nee i qwalaala/iye', nee i ooiye', «AAKO i xirfuuti, asma iwa qwalaala/i as amohhooár sagadiyusmoowós!»

²⁸ Daqaní aníng gan'amuuwók u alki/iít, nee xirfuuwók u axweés tlaatla/aangw sleémeero.