WARA'AMI 34 - Biblía Axweesantá Hhohho' ar Mungú 2004

Ilahhooa as hhooeemaá Mungú

(Daa'ángw Daudi aa daá' qoomár iwa dír Abimelékír i dirii'i. Tina slarhhamuú ilaqaás as kuwa guusi, kuri tsuwa guús, iri /úy)

¹ Aníng AAKOÓ MUNGÚ u diidi'iimiís qooma sleémeero, inós afkwe'eene u xirfayeemiís daqisleém.

² Muunaáeé' AAKOÓ MUNGÚ gu xirfayeemiis, múk slahhahhaá' tí ka axaasi, nee ta qwalaala/i.

³ Gimsé', AAKOÓ MUNGÚ xirfayeemisaare' dinkwa nee aníng, inós u aldiidi'iisaán.

⁴ AAKOÓ MUNGÚ una firiím iri mu/aywaáts, daer'eé' sleémeero gari hingeés.

⁵ Amór Mungú i warqawaak ta qwalala/á', daqaní kuungá' tundu baloó mureekeesiiká.

⁶ Liitlakusmoowí AAKOÓ MUNGÚ guna i /aá/, AAKO iri axaás, guri ba/amís baraá slahh'amaayeerós sleémeero.

⁷ Malaykamoó AAKOÓ MUNGÚ mukdá' AAKOÓ MUNGÚ gu ilaiwawaá/, gun harweer ar slumtós as nguwa xun guri ba/amis.

⁸ Áx araak, adór AAKOÓ MUNGÚ kur hhoó', heé amohhoó' a kudá' goów amór AAKOÓ MUNGÚ.

⁹ AAKOÓ MUNGÚ ilaiwawa/aak kuungaásingaá mukós oo hhohhó', asma kudá' inós ilaiwawa/á' gár kiwa /aár i káhh.

¹⁰ Tam na/aá diraangw i alná' niri qwariitiyá'. Ala kudá' AAKOÓ MUNGÚ ngu ilaiwawa/á' gár hhoo' ka dakumisiiká.

¹¹ Qwalaasaré', kuungá' ná/ii, iiárií qaasaré', án kuungá' nu intsaahhatimiís adór AAKOÓ MUNGÚ kur ilaiwawa/a'.

¹² A heemá heé slafíngw slaá'? A heemá heé hootaá amohhooa awa deelór yaariir gi slaá'?

¹³ Tsifraangók ila/eek dír muruú tlakwe, nee fola maweek.

¹⁴ Muruú tlákw maweek, tlehhma'aá hho' na tlehhiiteek, wayda leelehhiiteek nee ar hooteek.

¹⁵ Asma ilaá AAKOÓ MUNGÚ i dír mukdá' hota ganaa'á', nee firor'ín ga axamiis.

¹⁶ Ala AAKOÓ MUNGÚ kudá' tlakweemaá tlehhiitá' gi sii', inooín kiri gunqaarees baraá yaamuwo.

¹⁷ Qoomár múk ganaá' bir /aa/amín amór AAKOÓ MUNGÚ, gin iiárií qaas, giri ba/amis baraá slahh'amaayer'ine.

¹⁸ AAKOÓ MUNGÚ ku haratseéw dír múk aa mune si'i, nee kudá' naa diqay tsatitiye' gin ba/amimis.

¹⁹ Slahh'amuú heé gan'amuú koóm ku yaariír, ala AAKOÓ MUNGÚ gu tuu/ baraá tí sleémeero.

²⁰ AAKOÓ MUNGÚ slaqwtá heewí sleémeero gan de'én, tam fartós ar wák ka geeqayká.

²¹ Heé tlakweemaá tlehhahhiít, tlakweemaawós ngu gaasiyá', nee kudá' heé hota ganaá' ngu ahhiitá' ki sakwasleemuut.

²² AAKOÓ MUNGÚ sagadiyuuseerós ga ba/amis, kudá' sleémeero AAKOÓ MUNGÚ ngwa i guwiye' ki sakwasleemutiiká.