WARA'AMI 33 - Biblía Axweesantá Hhohho' ar Mungú 2004

Daa'ángw xirfayeemis

¹ AAKOÓ MUNGÚ sa baraa/aak, kuungaásingá hota ganaa'á'. I hariín múk mune hhohhó' AAKOÓ MUNGÚ kuwa xirfayeemisi.

² AAKO MUNGÚ xirfayeemisaak ar gidaandoori, sa daa'aak ar seése,

³ i daa'aak ar daa'ángw /abén, baraa/é', daa'aangw tsu'usaak ar seése.

⁴ Asma axweesantá AAKOÓ MUNGÚ i looeemaá koón. Nee gadiyeérós sleémeero ga tleehh ar inkihhimu.

⁵ AAKOÓ MUNGÚ sakwasleemár gan'amu ga slaa'. Yaamu i hatsiyá' sla'aarirós ar warqawaakahe.

⁶ Ar axweesantá AAKOOWO doori nina tleehharuutiyé', muruú gawaá doori sleémeero ina tleehharuút ar afkós.

⁷ Ma'aay sleémeero gina dír wák i burumbuúr, iloo giri tleéhh awa ma'aay ni meetiya'.

⁸ Yaamu sleémeero AAKOÓ MUNGÚ ngu sa da'ayuutiye', kudá' daanduú yaamaá hootá' sleémeero ngu ilaiwawa/iye'.

⁹ Asma inós ngiwa oó' iri tleehharút, inós iwa ilawaáts iri deerút.

¹⁰ AAKOÓ MUNGÚ axweesanoó múk xoordu taa qoomeemeés guna hhitín, muruudá' ta aldakuút guri warqeés.

¹¹ Axweesantá AAKOÓ MUNGÚ aa oó' i warqeeraaká ay kureerisleém. Inslawoó muunaáwós i kumaamiit dír qari sleémeero.

¹² Xoorór amohhoo' a tidá' AAKOÓ MUNGÚ tawa Munguúín. Múk amohhoó' a kudá' inós aa aalirós wa tsawaár.

¹³ AAKOÓ MUNGÚ i xumiis gawaá doorií wa ale, muu sleémeero gu ga/áy.

¹⁴ Muu sleémeero oo daanduú yaamuú wa hoót gu ga/áy, iimír gawaá kitaangós oo waawuti'iimár wa ale.

¹⁵ Kudaádá' muner'ín sleémeero gaa amohhe'emiís, an kudá' gadiyér'ín sleémeero ga xuú'.

¹⁶ Waawutmo i baalinká as yaareemaá slaqwaruuseerós, slaqwarusmo ti tu/iiká as iwa /uuruú kon.

¹⁷ Faraási u arba/atír i sleeraaká baraá slaqwaraaro, hee sleeme gu tu/ká ar yaareemaá /uuruuwós.

¹⁸ Ga/aaweek, iltá AAKOÓ MUNGÚ i dír kudá' ngu ilaiwawa/á', kudá' sla'aarirós ar warqawaaká ngi harahhifá',

¹⁹ as inooín ngiwa tu/i baraá gwa'araro, nee ngiwa /iisi qoomár giyeede.

²⁰ Atén AAKOÓ MUNGÚ un harahhifaán, inós an alee/isayrén nee baqmoorén adór gaamboót.

²¹ Atén inós un sa qwalaala/aán, asma umuuwós kudá' hhoohhoó' ugwa harahhifaán.

²² AAKOÓ MUNGÚ, sla'aarirók ar warqawaaká ngir hootaán, asma kuúng a harahhifoorén.