WARA'AMI 32 - Biblía Axweesantá Hhohho' ar Mungú 2004

Hingeemisuú tlakweema

(Wara'amtá Daudi. Daa'ángw intsaahhatimis)

¹ Heé amohhoó' a kudá' tlakweemaawós taa gurtláy, nee dakuúsarós taa tuuntuúk.

² Heé amohhoó' a kudá' AAKOÓ MUNGÚ i tlakweemií harafaditiiká, nee baraá muunaáwose ku waqooda wásl.

³ Qoomár kangw'eé' nguwa alxasliít, faduueé' nay slahhaaiyé', niri /aa/amaamiím ar /ifo qooma sleémeero.

⁴ Asma xweera nee tlaatla/aango dakók ina al iilooúy. Hame iri al kát, án tari adór yaamaá kaahaar awa qoomár age.

⁵ Án dakuúsar'eé' ngiri dirók i alki/iít, nee adór nira qwaár aga duqumiiká diroge. Niri oó', «Dakuúsar'eé' a gwadidiím dír AAKOÓ MUNGÚ.» Kuúng dakuúsar'eé' kari gurtleér.

⁶ Daxta umuúqo heé inkihhime, kuúng u firín qoomár tuwa slaslay. Qoomár tsaxwaá yau niwa doowatsiné', ala inós ma'aay ngu i hardihiaaká.

⁷ Kuúng an dír ni nahhaat, án kuúng in amohhe'eemís qoomár slahh'amuuwo, Án ba/amarók ngiri daá' ar qwala/, asma kuúng an baqmor'eé'.

⁸ Aako i kaahi aníng kuúng un intsaahhatís, nee lohduuwók ngi qwatsiím. Án kuúng un gan'amiís ar inkihhimu.

⁹ Ma adór faras tleehhitaara', laqaá adór wayshamó kudá' tsaahha wasl, kin gan'amiis ar him'eedá' kira afe tsegiít, as kiwa il/an.

¹⁰ Heé tlakusmo muxtár yaariir ga sláy. Ala heé AAKOÓ MUNGÚ gu harahhiíf kwaa harweér ar sla'aarír warqawaaká ar AAKO.

¹¹ AAKOÓ MUNGÚ sa qwalaala/aak, i baraa/aak, kuungaásingaá hota ganaa'á'. Ururu'umisé' ar qwala/ kungaásingaá sleémeero mune gan'ayen.